A pensión media galega representa o 85,26% da pensión media estatal

A pensión media de Galicia situouse en 886,30 euros a 1 de decembro, cun total de 769.074 prestacións, segundo os datos que publica este martes o Ministerio de Seguridade Social.

En total, o número de pensións incrementouse un 0,37% e representa o 7,76% do conxunto estatal. A pensión media galega representa o 85,26% da pensión media estatal e un aumento do 2,35% en variación anual.

Por tipo, as pensións de viuvez alcanzaron as 185.565 na comunidade galega, cunha media de 627,17 euros; mentres que as 482.620 de xubilación situáronse en 1.011,38 euros de media. No conxunto estatal, a Seguridade Social destinou neste mes de decembro a cifra marca de 10.309 millóns de euros ao pago de pensións contributivas, un 3,2% máis que no mesmo mes de 2020.

XUNTA

Pola súa banda, a Xunta informa que xa ingresou o complemento extraordinario para os case 36.000 perceptores de pensións non contributivas da comunidade.

Adiantou esta axuda destinada aos pensionistas de xubilación e invalidez na súa modalidade non contributiva, a anciáns e enfermos perceptores do fondo de asistencia social e ás persoas con discapacidade que perciben o subsidio de garantía de ingresos mínimos.

Concentración convocada por UGT e CCOO en Vigo para reclamar a derrogación das reformas laborais e da reforma das pensións, e para esixir a subida do Salario Mínimo Interprofesional.