Soben a 107 os maiores con Covid en residencias en Galicia: son 73 máis que hai unha semana
Dezanove deles atópanse nunha Ordes e 15 noutra de Vilaboa.
Por Europa Press / Redacción | SANTIAGO DE COMPOSTELA | 05/01/2022 | Actualizada ás 14:10
Os casos activos de Covid-19 detectados en maiores de residencias de Galicia repuntan a 107, que supoñen 73 máis que os 34 rexistrados hai unha semana, entre os que se inclúen 19 nun centro de Ordes, 15 noutro de Vilaboa e 12 nunha en Culleredo (A Coruña).
Así o reflicte o balance semanal actualizado cada mércores polas consellerías de Política Social e Sanidade en relación aos casos de Covid-19 en residencias de maiores de Galicia e de discapacidade. Estas últimas rexistran dous casos en usuarios de dous centros, que implican sete menos que os nove rexistrados hai unha semana.
No caso concreto das residencias de maiores, segundo os datos actualizados, hai 19 maiores contaxiados na Residencia de Ordes; 15 na Residencia Pontevedra en Vilaboa; 12 na Residencia Orpea de Culleredo; nove na Clece Vitam Bastiagueiro; oito na F.R. Vía da Prata e seis nunha de Marín.
A estes súmanse cinco casos en cada unha das residencias da Veiga, Santa Marta de Vigo, F.R. Bo Día Castrelos e outra do Valadouro; mentres que os centros DomusVi Barreiro, CRAPD I e II e Servisénior de Brión contan con tres cada un.
Mentres, concentra dous casos a F.R. Parque Zapateira e teñen un a Residencia Arteixo, a José Otero, o Castro Ribeiras de Lea, a Residencia de Trabada, a DomusVi Barbadás, a F.R. Cerdedo-Cotobade e a Servisénior de Vilagarcía.
DISCAPACIDADE
Pola súa banda, con respecto ás residencias de atención á discapacidade en Galicia, os datos actualizados reducen a dous os usuarios con Covid-19, fronte aos nove de hai unha semana, que supoñen sete menos.
En concreto, rexístrase un no CAPD de Sarria (Lugo) e outro no CAPD de Redondela (Pontevedra).
