Por Galicia Confidencial | PONTEVEDRA | 09/01/2022 | Actualizada ás 10:00
No último pleno celebrado en Cuntis as facturas irregulares foron protagonistas. Diso se encargou o portavoz municipal de Veciñanza, que poñía de manifesto a "demencial" xestión económica do Goberno Local.
Desta forma se expresou durante o debate da Conta Xeral de 2020 que presenta "facturas impagas dende o ano 2017, así como múltiples irregularidades contables e uns indicadores que sitúan ao noso concello entre os peores da provincia no que se refire ao Periodo Medio de Pago a Provedores (PMP)". Ademais, o portavoz de Veciñanza calificou de "insostible" o "abuso" do levantamento de reparos de intervención para a xestión de débedas que incumpren a Lei de Contratos Públicos.
Como mostra desta situación, Veciñanza fixo públicos os movementos económicos rexistrados en Decretos de Alcaldía do 31 de decembro. Así, deron conta de que só durante o último día do ano, o Alcalde de Cuntis deu orde de pago por un total de 142.278'60 €, dos cales 98.200'83 € pertencen a facturas irregulares que se aboarán mediante o antes citado levantamento de reparo de intervención.
As "presas" do último día do ano por xestionar o pago de facturas e evitar así incrementar a débeda que o Concello de Cuntis arrastra dende hai cinco anos, aseguran dende Veciñanza, levou ao Alcalde Campos a chegar case aos 100.000 euros en facturas irregulares só durante un día. Esta cifra, para un orzamento de catro millóns de euros e un concello con pouco máis de 4600 habitantes, consideran, é "absolutamente desorbitada e fala moi ás claras da xestión económica do goberno do PSOE".
Ademais, Veciñanza informaba tamén de que "un ano máis" o Concello de Cuntis inicia o exercicio "sen nin tan sequera" proposta de Orzamento Municipal. A isto respondía o Goberno Local cunha nota de prensa, na que anunciaba que traballa na presentación das contas para este ano 2022.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.