Galicia recupera as súas exportacións apoiándose nos combustibles fósiles
A Comunidade acada un saldo positivo --a diferenza do conxunto do Estado-- grazas ao pulo destas materias.
Por E.P. | SANTIAGO DE COMPOSTELA | 20/01/2022 | Actualizada ás 12:18
Galicia rexistrou vendas ao exterior por 2.463,9 millóns de euros en novembro, un 17,2% máis que no mesmo mes do pasado ano, segundo as cifras que publica este xoves o Instituto Galego de Estatística (IGE). Despois dun outubro no que as exportacións se dispararon un 65%, cinco veces máis que a media española; as vendas ao exterior da economía galega manteñen o seu balance positivo, aínda que por detrás do conxunto estatal, que presenta un incremento do 22,6% respecto de novembro de 2021.
Na media do que vai de ano, entre xaneiro e novembro, Galicia alcanza xa os 23.122,7 millóns en exportacións, un 22,2% máis en comparativa co mesmo período de 2020 e un punto por encima da media estatal (21,2%). Así as cousas, Galicia é a sexta comunidade autónoma con mellor comportamento no que vai de 2021 e dispón dun saldo positivo de 4.858,4 millóns entre exportacións e importanciones, mentres que a balanza comercial de España continúa negativa en novembro.
Segundo os datos do IGE, o incremento nas exportacións durante o undécimo mes do ano débese ao bo comportamento das vendas de combustibles e aceites minerais, que soben un 220,5% e representan o 8% sobre o total. As pezas de vestir, que en outubro foron responsables do auxe do 65% das exportacións galegas, creceron en novembro un 5,6% nas que non son de punto e un 4% nas de punto.
Por países, as exportacións baixan un 39,5% a Francia, principal mercado da economía galega; pero aumentan a Portugal (+38,3%), Italia (+134,1%), Alemaña (+96,5%), Países Baixos (+108,1%) e Bélxica (+205,2%).
