O barrio do Ofimático da Coruña sae adiante tras anos en stand-by
O Concello da Coruña anuncia o comezo das obras para urbanizalo.
Por E.P. | SANTIAGO DE COMPOSTELA | 20/01/2022 | Actualizada ás 13:34
As obras de urbanización de Xuxán, o antigo Ofimático, comezaron este xoves. Trátase, segundo informa o goberno local, dunha actuación cun investimento superior aos 11,6 millóns de euros. O Concello adxudicou os traballos o pasado mes de decembro. Os mesmos contan cun prazo máximo de execución de 18 meses e suporán "a transformación completa do novo barrio, que contará con todos os servizos propios dunha área urbana e amplas zonas verdes".
O proxecto inclúe a conexión con Matogrande mediante pasos que desembocarán na rúa Juan Díaz Porlier. Ademais, executaranse os ramais de acceso á AC-10, glorietas, e unha conexión peonil provisional con Alfonso Molina. Por outra banda, o concello abre este venres o prazo para solicitude de axudas á rehabilitación de vivendas en Áreas de Rexeneración e Renovación Urbanas (ARRU). As subvencións están destinadas a inmobles dos núcleos de San Vicente de Elviña e Vos Mariñeiros.
