A Deputación de Pontevedra celebra o seu paso por Fitur cos "mellores resultados dos últimos anos"
Carmela Silva reivindica as cifras turísticas de 2021.
Por E.P. | Pontevedra | 24/01/2022 | Actualizada ás 14:25
A presidenta da Deputación de Pontevedra, Carmela Silva destacou o impacto da campaña de promoción turística '#LoveRíasBaixas' nas redes sociais e valorou "o grande éxito" da presenza da administración provincial na Feira Internacional de Turismo (Fitur) de Madrid.
Segundo dixo, o paso da Deputación por este evento conseguiu "os mellores resultados dos últimos anos para a provincia" en contactos, acordos, recoñecementos e impacto e visibilización da súa mensaxe.
Silva lembrou que nesta edición de Fitur Pontevedra recibiu "o Premio Sicted como mellor destino de Estado" e o distintivo 'Q de Calidade' para o Castelo de Soutomaior. Ademais, produciuse a adhesión da Deputación á Spain Filme Commission e a firma do convenio de promoción con Renfe, entre outras xestións.
A presidenta volveu incidir en que para o turismo, "a pesar da covid, o ano 2021 só deu alegrías", xa que Pontevedra, segundo os datos do Instituto Nacional de Estatística, é "a provincia do turismo líder en Galicia en noites nos establacimientos hostaleiros, cunha ocupación do 38 por cento do total da Comunidade".
Máis dun millón de persoas elixiron Pontevedra para as súas viaxes ou desprazamentos, o 32,62 por cento do total que viaxaron a Galicia en 2021, segundo destacou, "grazas ao bo facer desta administración provincial e do sector privado". "Iso é innegable", remachou.
En vista destas cifras, e despois da polémica que xerou a retirada da Deputación da 'caseta' da Xunta en Fitur, Carmela Silva apuntou que lle gustaría "que de cando en vez" lle "felicitase publicamente" o vicepresidente primeiro e conselleiro de Presidencia, Xustiza e Turismo da Xunta, Alfonso Rueda.
