O alcalde de Entrimo contra o xigante EDP: "Non imos prohibir visitar a aldea sumerxida de Aceredo"

Os baixos niveis de auga no Encoro de Lindoso non son ningunha sopresa nesta época de ano (cada outono a Eléctrica de Portugal procede a un baleirado intenso da presa) pero si se están a prolongar no tempo "dunha maneira acentuada" e contrastan coa situación do Encoro de Vilariño das Furnas. A tan só dez quilómetros, esta presa está a máis do 60% da súa capacidade. Para o alcalde de Entrimo, Ramón Alonso, a situación evidencia que máis aló do factor climatolóxico haberá unha razón que será, "coma sempre, económica".

"Os afluentes e ríos que verten no encoro con máis ou menos caudal, entran, e polo tanto entendo que é unha cuestión de baleirado por razóns estritamente de explotación económica", esgrime o rexedor de Entrimo. E os baixos niveis de auga no Lindoso provocan non só que aldea de Aceredo se deixe ver de cando en vez, senón que desta volta fixo que a EDP se dirixira aos rexedores de Lóbios e Entrimo solicitando colaboración para que os visitantes non se despracen á aldea pantasma de Aceredo. Algo que, como xa adiantaba Galicia Confidencial, non farán.

"Son bens que están dentro da súa propiedade, que explotan eles en exclusiva, e polo tanto que nos demanden medidas para evitar danos nos bens que agora quedan ao descuberto pola súa maneira de xestionar o encoro, non nos parece lóxico nin ten xustificación de ningún tipo" zanxa o alcalde de Entrimo. Ao email da EDP, di Ramón Alonso, non respostarán por carecer de "sustento e respostas posibles". Aínda que si estoutro asunto: "hai algunhas cuestións pendentes con eles referidas á limpeza de terreos que son propiedade súa, e levamos anos intentando que se lle dé unha solución porque están xerando problemas, así que aproveitaremos para comentarlles esta carta en concreto".

Como aproveita tamén o rexedor para facer unha vella reivindicación: corrixir o agravio comparativo cos municipios afectados por encoros. Porque, debido a un tratado hispano- portugués da década dos 50 do século pasado, o carácter transfronteirizo da presa exime e EDP de tributar o IBI que lle corresponde por este tipo de instalacións. "Levamos tempo intentando que se modifique e a día de hoxe non fomos capaces", lamenta Ramón Alonso.

O rexedor de Entrimo insta a reverter unha "situación que abonda na inxustiza do que xa foi un drama no seu momento". Porque a perda de terras útiles, de poboación, a afección que supón esta masa de auga que en cuestión de néboas e ventos mudou a climatoloxía da zona, o desarraigo, non foi compensada-- nin tan sequera-- economicamente, "cobrando o IBI que corresponde".