O PSdeG reclama á Xunta unha xestión "pública e directa" das ambulancias
O xerente do Sergas, José Flores, presenta o Código Anafilaxia, un procedemento para atender reaccións alérxicas.
Por E.P. | SANTIAGO DE COMPOSTELA | 27/01/2022 | Actualizada ás 17:37
A Xunta defendeu a xestión concesionada do transporte sanitario terrestre este xoves na Comisión 5ª de Sanidade, Política Social e Emprego, en resposta a unha pregunta oral exposta polo grupo socialista na que reclamaba recuperar a xestión "pública e directa" do sistema de ambulancias. O PSdeG expuxo que, desta forma, a xestión sería "máis eficiente e con maior calidade de servizo", que agora é, ao seu xuízo, "desastrosa".
"A xestión da Xunta de Galicia das ambulancias está cada vez máis cuestionada, cun modelo concesional que deixa a xestión en mans de empresas privadas e presenta máis sombras que luces", sinalou o deputado Julio Torrado. O socialista lamentou a este respecto que o Executivo autonómico queira "replicar" o modelo concesional de Madrid, en lugar de reverter o servizo ao público como sucede en Navarra ou Baleares.
"Renuncian a utilizar un modelo de xestión máis eficiente, no que gastando o mesmo que agora fariamos moito máis. Estamos a pagar a prezo de ambulancias novas e perfectamente equipadas, outras reutilizadas doutros lugares, que mesmo suscitaron unha sentenza xudicial en contra por exceso de peso nos vehículos, que incumprían os requisitos de seguridade", criticou.
O xerente do Sergas, José Flores, que respondeu por parte da Xunta, argumentou que o servizo concesionado funciona, polo que non habería motivos para cambialo. Ademais, respecto da situación en Baleares, destacou que "gastan a mesma cantidade de diñeiro, non teñen menos conflitividade e, en xeral, están igual de contentos que co outro tipo de xestión". "Aválanos a satisfacción dos usuarios, do 93% e, no caso das ambulancias con soporte vital avanzado, do 94%", sinalou Flores, que apuntou ademais que gran parte do orzamento se destina ao cumprimento do convenio colectivo fronte ás críticas do PSdeG a este respecto.
Torrado cuestionou tamén a falta de vehículos nalgunhas zonas, citando a de Baixo Miño, A Mariña ou Ortegal, e mesmas zonas céntricas como O Deza ou Terra de Montes, entre outras. Sobre esta cuestión, o xerente do Sergas lembrou que en 2019 se incrementaron as dotacións e que Galicia é unha das comunidades con máis recursos de transporte. Ademais, insistiu en que a cobertura de necesidades se fai en base aos estudos previos realizados polo 061.
CÓDIGO ANAFILAXIA
Por outra banda, o xerente do Sergas informou na Comisión sobre o Código Anafilaxia, en marcha desde maio do ano pasado; un procedemento de actuación sanitaria baseado no recoñecemento precoz dos signos e síntomas dunha reacción anafiláctica, coa consecuente priorización de coidados e traslado inmediato a un hospital co fin de mellorar a supervivencia e reducir as complicacións.
A este respecto, explicou que o Sergas creará un Equipo Código Anafilaxia cun coordinador como líder do proxecto en cada área sanitaria, un equipo multidisciplinar encargado de difundir o Código, realizar o seguimento da implantación e detectar áreas de mellora e propor medidas correctoras. A isto súmase o deseño de contidos para docencia e difusión do Código entre pacientes e profesionais sanitarios.
Estímase, sinalou Flores, que o 4% da poboación ten alerxia a algún alimento e o 3% á picadura dun insecto, o que supón que, aproximadamente, uns 200.000 persoas galegas poderían sufrir unha reacción ante certas exposicións. Ademais, existe unha elevada recurrencia en cada paciente, podendo alcanzar o 54%, ben pola mesma causa ou por outra relacionada.
