A Xunta inicia a elaboración da Estratexia de Acción Voluntaria 2027 para "amplificar o impulso solidario galego"
Por E.P. | Santiago de Compostela | 28/01/2022 | Actualizada ás 18:46
A conselleira de Política Social, Fabiola García, presidiu a reunión do Observatorio de Acción Voluntaria na que se acordou iniciar a elaboración da Estratexia de Acción Voluntaria 2027, que busca "recoller e amplificar o impulso solidario dos galegos".
A titular de Política Social destacou a traxectoria "ascendente" do voluntariado galego, que nos últimos anos multiplicou por 30 o número de experiencias de voluntariado certificadas pola Xunta de Galicia.
A base das novas liñas estratéxicas será o estudo realizado pola Xunta hai uns meses sobre o perfil do voluntariado en Galicia. Este documento, sinalan, permite realizar "un retrato fiel das entidades que dan vida a esta actividade, das súas preocupacións e das súas prioridades".
Para maximizar a aplicación desta folla de ruta, Fabiola García convidou a todos os axentes implicados na acción voluntaria a que realicen as súas achegas.
