A Deputación da Coruña destina 450.000 euros para bolsas destinadas a estudos artísticos

A Deputación da Coruña financia este ano 45 bolsas de investigación e de perfeccionamento de estudos artísticos, nas que inviste un orzamento total de 450.000 euros. O Boletín Oficial da Provincia (BOP) recolleu este venres a aprobación das bases reguladoras destas axudas para o 2022.

Doutra banda, a Deputación aprobará no pleno ordinario do mes de febreiro un proxecto de mellora da seguridade viaria na DP-2303 en Bermún, no Concello de Cee. Esta obra conta cun investimento de 647.220,11 euros.

Respecto das bolsas para o perfeccionamento de estudos artísticos, as persoas beneficiarias recibirán axuda para custear o gasto derivado dos seus cursos fóra de Galicia durante o período 2022-2023. O ente provincial dedica 250.000 euros para financiar 25 bolsas, cunha achega de 10.000 euros cada unha.

No ámbito da investigación, inviste 200.000 euros en 20 bolsas dirixidas a persoas con titulación universitaria que pretendan facer un traballo no período 2022-2023, cunha duración mínima de nove meses.

COWORKING

Doutra banda, o presidente da Deputación da Coruña, Valentín González Formoso, asinou este venres un convenio co alcalde da Pobra do Caramiñal, José Luís Piñeiro García que permitirá dinamizar o centro de coworking deste concello.

Con este pacto, A Pobra pasa a integrarse na Rede Provincial de Espazos de Traballo Colaborativo, do que xa forman parte outro dez centros: Oleiros, Carballo, Brión, Boiro, Ames, Moeche, A Capela, As Pontes, Vedra e Santiago.

Noutra orde de cousas, a Deputación da Coruña conmemora do Día da lingua materna cun espectáculo familiar que na biblioteca provincial. A celebración consiste na representación do conto musicado 'A música das buguinas' narrado por Mamá Cabra e con música de Bellón Maceiras.

O presidente da Deputación da Coruña, Valentín González Formoso, na súa comparecencia na comisión de orzamentos do Parlamento de Galicia