O BNG mantén a estimación de voto do 0,6% no último barómetro do CIS, previo á crise do PP
O estudo correspondente ao mes de febreiro situaba ao PSOE cunha vantaxe de 7,3 puntos sobre o Partido Popular.
Por Europa Press / Redacción | SANTIAGO DE COMPOSTELA | 22/02/2022 | Actualizada ás 17:28
O Barómetro de febreiro do Centro de Investigacións Sociolóxicas (CIS) correspondente ao mes de febreiro, feito antes das eleccións de Castela e León e da crise interna do PP, mantiña unha estimación de voto do 0,6% ante unhas eleccións xerais. En concreto, esta enquisa de opinión volva situar ao PSOE como primeiro partido cunha estimación de voto do 28,6% e unha vantaxe de 7,3 puntos sobre os 'populares', que quedaban no 21,3%.
Na terceira praza repite Vox cun apoio estimado do 14,8% e 1,2 puntos por encima de Unidas Podemos, que se anota un 13,6%. Moi lonxe queda Ciudadanos, ao que só se atribúe un respaldo do 4,8%.
Esta análise baseouse en 3.860 entrevistas telefónicas realizadas a electores de 1.269 municipios de 50 provincias entre os días 1 e 12 de febreiro, é dicir, antes das eleccións autonómicas celebradas en Castela e León e, por tanto, antes de que estalase a crise interna no PP co enfrontamento da presidenta madrileña, Isabel Díaz Ayuso, coa dirección nacional de Pablo Casado.
UN DE CADA CINCO VOTANTES XA TEN DECIDIDO VOTAR A SÁNCHEZ
Se mañá mesmo se celebraran as eleccións xerais, un 21% dos enquisados xa adianta o seu apoio ao PSOE, fronte a un 13,3% que anticipa o seu voto ao PP, un 10% a Unidas Podemos e un 8% a Vox. Iso si, hai un 9,4% que se abstería, un 15,3% que aínda non o sabe e un 4,2% que evita responder. Pola súa banda, un 0,5% dos enquisados avanza o seu voto ao BNG.
A conclusión do CIS é que neses primeiros días de febreiro o PSOE conta cunha estimación de voto do 28,6% (cunha marxe de erro de máis/menos 1,5 puntos), o que supón unha décima máis que o mes anterior e seis décimas máis que o seu resultado electoral de novembro de 2019. A súa vantaxe sobre o PP sobe a 7,3 puntos, tres décimas máis que en xaneiro, porque os 'populares', antes mesmo da súa crise interna, caen dúas décimas nun mes e agora anótanse un 21,3%, dúas décimas menos que o mes anterior pero medio punto mellor que nas últimas xerais.
A terceira praza é para Vox, que cumpre catro meses ininterrompidos de ascenso nas enquisas do CIS. En febreiro, antes da súa irrupción nas Cortes de Castela e León, marcaba un 14,8%, un punto máis que un ano antes. Detrás segue Unidas Podemos, cun respaldo estimado do 13,6%, medio punto máis que en xaneiro pero unha décima menos que en decembro.
CIUDADANOS CRECE PERO SEGUE POR BAIXO DO 5%
Xa máis lonxe aparece Ciudadanos, que repite por segundo mes consecutivo por baixo do 5% que dá opción a grupo propio no Congreso. En concreto, o CIS atribúelle agora unha estimación de voto do 4,8%, que supón un rebote de oito décimas respecto ao mínimo que marcara o mes anterior, pero aínda así son dous puntos por baixo do seu resultado electoral de 2019 que provocou a dimisión de Albert Rivera.
En canto ao resto, Más País aparece cunha estimación da 2,5%, ERC mantense como primeiro partido catalán cun 2,4% fronte ao 1,6% de Junts e o 1% da CUP, e o PNV segue por diante de Bildu, cun 1,3 e un 1,1% respectivamente
Ademais, case a metade dos enquisados (47,7%) cre que o PSOE gañará as próximas eleccións, fronte a un 27,1% que prognostica unha vitoria do PP, e o socialista Pedro Sánchez é o favorito para presidir o Goberno, pero cunha diferenza mínima respecto de Yolanda Díaz: 20,1% fronte ao 19% que desexaría ver á dirixente de Unidas Podemos en Moncloa.
Casado en cambio só é preferido por un 9,5%, pero polo menos ten máis adeptos que Isabel Díaz Ayuso, a quen o CIS inclúe nesa pregunta a pesar de non ser candidata á Moncloa e que só é mencionada polo 2,1% dos enquisados.
Pedro Sánchez segue mantendo uns niveis de confianza moi superiores aos de Casado. Un 30,1% dos enquisados confía moito ou bastante no presidente fronte ao 66% que desconfía, mentres que no líder do PP só confía un 8,6% e hai un 87,5% que di ter pouca ou ningunha confianza nel.
YOLANDA DÍAZ ROZA O APROBADO
En canto á valoración de líderes, mantense na cabeza a vicepresidenta Yolanda Díaz, sinalada como próximo cartel electoral de Unidas Podemos, que saca unha nota de 4,87 puntos por encima dos 4,49 puntos de Sánchez.
Detrás seguen o líder de Más País, Íñigo Errejón, con 4,01, e máis lonxe Inés Arrimadas (Ciudadanos) e Pablo Casado (PP), con 3,65 e 3,23 respectivamente. Pecha a lista o presidente de Vox, Santiago Abascal, cunha nota de 2,71.
