Formoso demandará á SEPI e a Navantia un dique seco cuberto para o estaleiro de Ferrol
O secretario xeral do PSdeG visita este mércores o Centro de Excelencia do Sector Naval.
Por E.P. | SANTIAGO DE COMPOSTELA | 23/02/2022 | Actualizada ás 17:15
O secretario xeral do PSdeG, Valentín González Formoso, asegurou que demandará á presidenta da SEPI, Belén Gualda, e ao presidente de Navantia, Ricardo Domínguez, a construción dun dique seco cuberto no estaleiro de Ferrol.
Remarca que esta é "unha reclamación que xa coñecen, unha reclamación da cidade, do Parlamento de Galicia, da sociedade e da propia lóxica", xa que "quen coñeza o funcionamento deste estaleiro verá que, en moitas ocasións, soldadores e tubeiros teñen que ter en conta as inclemencias do tempo", o que xera "unha perda de rendementos que está cifrada e que motiva que sexa máis dificultoso o poder competir a nivel internacional".
Estas manifestacións realizounas o tamén presidente da Deputación da Coruña no mediodía deste mércores en Ferrol, nas instalacións do Centro de Excelencia do Sector Naval (Cesena), situadas no edificio do CIS da Cabana. Alí, estivo acompañado, entre outros, polo alcalde de Ferrol, Ángel Mato, e o secretario provincial do PSOE na Coruña e tamén alcalde de Pontedeume (A Coruña), Bernardo Fernández.
En canto a estas instalacións tecnolóxicas, Formoso detallou que nelas desenvolven o seu labor "máis de 30 traballadores e supón unha aposta máis que necesaria". Incide que é necesario "gañar licitacións a nivel internacional" e que esta posibilidade vén "aparellada en darlle ferramentas ao estaleiro para facelo competitivo".
Pola súa banda, o alcalde de Ferrol, Ángel Mato, destacou "a aposta moi clara" por parte do Goberno de España "pola cidade, por Navantia e por Galicia", despois de aprobar o "programa de construción naval máis importante en décadas", en alusión ás novas fragatas F-110 e a que este centro se creou "grazas ao contrato de Navantia con Siemens para a transferencia tecnolóxica ligada ao devandito programa".
