Por Europa Press / Redacción | SANTIAGO DE COMPOSTELA | 02/03/2022 | Actualizada ás 12:05
A Xunta abriu este mércores, día 2 de marzo, o prazo de solicitude para a implantación de proxectos de biomasa nos fogares galegos o que, segundo sinala, permitirá un aforro anual nas facturas enerxéticas de 360.000 euros.
O Goberno galego, a través da Vicepresidencia segunda e a Consellería de Economía, Empresa e Innovación destinará 1,5 millóns a esta convocatoria de concorrencia non competitiva non dirixida ás familias galegas e que se xestiona a través de entidades colaboradoras.
A contía de axudas será dun 50%, ata un máximo de 60.000 euros, para apoiar proxectos con fins de aforro enerxético que fomenten enerxías renovables como é o caso da biomasa. Para garantir o máximo aproveitamento enerxético do combustible e minimizar as emisións, os equipos de xeración de calor deberán ser instalacións con avanzadas prestacións operativas, elevados niveis de eficiencia e un bo comportamento con respecto ao medio ambiente.
Con esta liña de axudas, o Goberno galego di que quere fomentar o uso de enerxías renovables, e máis nun momento de escalada de prezos enerxético. Así, unha caldeira de biomasa supón aforros de ata o 50% con respecto ao gasóleo e dun 30% con respecto ao gas natural. Nunha vivenda unifamiliar permite aforros de 1.800 euros ao ano con respecto aos radiadores eléctricos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.