O PP galego "xa bota de menos" a Feijóo e promete unha sucesión "ordenada e sosegada"

"Aínda non se foi e xa o botamos de menos". Así o recoñeceu este venres o secretario xeral do PPdeG, Miguel Tellado, en relación á decisión de Alberto Núñez Feijóo de optar a liderar o PP. Ao tempo, ratificou que a sucesión do seu xefe de filas tanto no partido como na Xunta será "ordenada, tranquila e sosegada".

Tellado secundou a mensaxe xa lanzada polo propio Feijóo en relación a que a prioridade orgánica agora é o congreso extraordinario dos días 1 e 2 de abril en Sevilla, e non toca polo momento falar da substitución. Cando o sexa, acometerase de forma "responsable, ordenada e tranquila".

Non en balde, o propio presidente avanzou xa que a súa intención inicial é compaxinar a Presidencia do PP e da Xunta nun período de transición inicial.

Pola súa banda, o aínda presidente da Xunta, Alberto Núñez Feijóo, evitou este venres en Ourense dar pistas concretas sobre como articulará o seu proxecto para o PP unha vez que vexa ratificado o seu liderado no congreso extraordinario de Sevilla dos días 1 e 2 de abril. "Aínda queda algún período de xestación", limitouse a contestar, a preguntas dos xornalistas.

Aínda que Feijóo dixo que ten "planificados" marzo e abril, hai cargos do PP galego consultados por Europa Press que apuntan que abril podería ser o mes elixido para fixar o calendario e que, en función do equipo do que se rodee en Génova, permanecer algunhas semanas máis en Galicia, incluso algún mes máis.

En xeral, as fontes consultadas coinciden en que terá que solucionar a súa situación antes de que finalice o actual período de sesións na Cámara autonómica, que, chegado o momento, tería que autorizar a súa designación como senador para abrirlle as portas das Cortes. O horizonte máximo para a partida definitiva de Feijóo albiscaríase en torno ao verán.

En canto ao que sucederá co partido, todas as fórmulas que permiten os estatutos populares están sobre a mesa, pero gaña adeptos a idea de que, na liña coa mensaxe dunha substitución sen ruído, poderíase optar porque o propio Tellado se faga cargo do partido temporalmente ata que se ratifique a substitución da Xunta.

Cando isto suceda, o natural no PPdeG é que o mesmo líder estea á fronte da Xunta e do partido, polo que o presidente da Xunta tamén sería ratificado como líder dos populares galegos. A vía menos ruidosa é a elección a través do Comité Executivo, plenamente vixente, tendo en conta que o PPdeG celebrou un congreso ordinario o pasado verán.

Un congreso extraordinario sempre podería ocasionar máis tensións, aínda que as distintas fontes consultadas apuntan a que a situación do partido é de "calma" e respecto aos "galóns" de Feijóo. Aos principais dirixentes non lles interesaría moverse ou caer en enfrontamentos ás portas xa das próximas eleccións municipais.

"SEGUIREMOS ESTANDO Á ALTURA"

Escenarios e cábalas políticas á marxe, Tellado evitou este venres falar de certezas e, aínda que Feijóo avanzou "respostas previsibles" ante preguntas sobre, por exemplo, o papel que terá o vicepresidente primeiro, Alfonso Rueda, á cabeza nas quinielas da sucesión, o secretario xeral manifestou a súa convicción de que todo o partido seguirá "estando á altura".

"Todos estaremos á altura", limitouse a manifestar, tras ser preguntado polo feito de que el mesmo, como deputado, podería estar na terna de candidatos a suceder a Feijóo na Xunta --é necesario ter unha acta no Pazo do Hórreo para poder acceder ser presidente de Galicia--.

TAREFAS DA XUNTA, "ATENDIDAS"

Ao tempo, o secretario xeral do PPdeG salientou que Feijóo non desatende as súas tarefas como presidente e esgrimiu que as cuestións da autonomía estarán "permanentemente atendidas" tamén cando se meta de cheo na campaña interna para o congreso.

"Todo está en orde", esgrimiu, fronte ás críticas da oposición, antes de advertir que a líder do BNG, Ana Pontón, "é a única galega" á que lle urxe que "marche Feijóo".

A Pontón, afeoulle que leva 18 anos en política e que o BNG perdeu "sucesivamente" todas as eleccións. Recomendoulle "tranquilidade e acougo", facer "propostas" e dedicarse "a moderar" o seu partido. De feito, responsabilizouna de "radicalización", de "mimetizar" ao Bloque cos nacionalistas vascos e cataláns, e de facer "moderado" a Xosé Manuel Beiras.

Ao xefe de filas dos socialistas galegos, Valentín González Formoso, botoulle en cara que critique que Feijóo vaia compatibilizar temporalmente un cargo orgánico e a Presidencia da Xunta cando Formoso é "secretario xeral do PSdeG, alcalde das Pontes e presidente da Deputación da Coruña".

"Calma, paciencia e tranquilidade. Farémolo con responsabilidade e acertando. Feijóo leva acertando nas súas decisións desde que se puxo á fronte do PP e nada fai pensar agora que nos vaiamos equivocar", esgrimiu, para concluír que en ningún momento, nin sequera no período previo de campaña de Feijóo, vai estar "desatendida" Galicia.