A máscara retirarase dos patios dos colexios "nos próximos días"

A Consellería de Sanidade confirmou este venres que en "próximos días" retirará a recomendación de manter as máscaras nos patios de colexios en Galicia e estudará a "retirada progresiva" en interior por "ámbitos". Así o afirmou este venres, en declaracións aos medios, o conselleiro de Sanidade, Julio García Comesaña. 

Preguntado sobre se se abordou a retirada das máscaras en interiores na reunión do Ministerio de Sanidade coas comunidades en Zaragoza, Comesaña explicou que "non" se tratou. "Todos pensamos que as máscaras algún día en interior se deixarán de utilizar e Galicia, en particular, considera que ten que empezar a abordarse", comentou, para matizar que ese "proceso de retirada de non será un día concreto".

"Cando sexa oportuno empezaremos reducindo máscaras en certos ámbitos", sinalou, para matizar que de "como facer as cousas falouse" no encontro en Zaragoza. "Nós imos dar un paso agora, coa retirada das máscaras nos patios, como dixemos, unha vez terminada a vacinación da segunda dose", manifestou en relación á inmunización da poboación infantil de cinco a 11 anos.

"MÁIS PRONTO QUE TARDE"

No caso concreto dos interiores, o titular de Sanidade apuntou que estudarán e "impulsarán" a "retirada progresiva da máscara" nese proceso que, apostilou, "vai chegar máis pronto que tarde". Preguntado en que ámbitos se comezará a retirar primeiro en interiores, o conselleiro puntualizou que se trata dunha cuestión "que ten que trasladar o relatorio de alertas" e, "a partir de aí seguir a discusión".

SEGUIMENTO DE CASOS

Sobre o encontro deste pasado xoves en Zaragoza, explicou que unha das cuestións debatidas se centrou en "como deixar de facer ese seguimento" dos casos de Covid-19 coas ferramentas desenvolvidas e en que ámbitos. "A proposta é que a próxima semana, o relatorio de saúde pública propoñerá un cronograma, asociado a algún fito no ámbito dos indicadores, probablemente ao de ocupación hospitalaria", comentou, para engadir que, a partir de aí, o "relatorio de alertas fixará un valor desde o que se fará só seguimento dos casos máis graves e xa non habería illamento dos casos positivos". 

"A sensación da reunión de onte é a dun traballo técnico ben feito, a semana pasada propoñiamos que a decisión fora con carácter técnico, así foi", afirmou, para matizar que "se avanzou moito no deseño do sistema de vixilancia".

PRORROGADO O USO DO CERTIFICADO

A Consellería de Sanidade decidiu prorrogar, polo menos 15 días máis, a petición do certificado Covid nos hospitais con ingreso e nas residencias sociosanitarias, así como a limitación de comensais por mesa nos locais de hostalaría. Así o confirmou tamén o conselleiro de Sanidade, Julio García Comesaña, a preguntas dos medios tras a firma dos acordos de xestión do Sergas en Santiago coas sete áreas sanitarias galegas.

"Imos manter de momento a petición do certificado neses ámbitos vulnerables, tanto nos centros hospitalarios con ingreso como nos sociosanitarios", explicou. Con respecto, á única restrición en vigor na hostalaría de Galicia nas dúas últimas semanas, o titular de Sanidade sinalou que a Xunta decidiu "manter ese límite de 10 e 20 en interior e exterior", respectivamente.

Con todo, matizou que seguirán "véndoo cada 15 días". "A verdade é que esta semana con esa repunta na incidencia acumulada a sete (días), pero non en ningún parámetro fundamental, pareceunos oportuno mantelas e iremos cada 15 días estudando esa situación", concluíu.