Galicia, segunda comunidade autónoma que máis enerxía renovable xerou en 2021

Galicia é a segunda comunidade autónoma que máis enerxía renovable xerou durante 2021. En total, xerou 24.205 GWh, dos que o 74,3% producíronse a partir de fontes de orixe renovable segundo os datos do 'Avance do informe do sistema eléctrico español 2021', presentados este venres polo grupo Red Eléctrica de España.

Segundo recolle o informe, Galicia, que só se sitúa por detrás de Castela e León, xera un de cada catro GWh hidráulicos que se producen en España. No seu conxunto, as renovables galegas produciron un total de 17.974 GWh.

A presidenta de Red Eléctrica de España, Beatriz Corredor, foi a encargada de presentar o informe durante un acto celebrado este venres. Durante a súa intervención, Corredor afirmou que "a transición ecolóxica é hoxe máis necesaria que nunca" e que "é a única vía para lograr a soberanía enerxética de Europa e é panca indiscutible da recuperación".

Nesta liña, Corredor sinalou que os datos do pasado ano "son sinal inequívoco" do avance "a bo ritmo e con paso firme" nesta materia. No caso de Galicia, isto tradúcese en cifras como que o 39,5% da súa xeración de enerxía provén de fontes eólicas.

Este dato converte Galicia na terceira rexión que máis enerxía eléctrica xerou grazas á forza do vento. Séguelle a hidráulica que, con 7.690 GWh foi a segunda tecnoloxía que máis produciu, alcanzando o 31,8% do total.