O Goberno pide un "esforzo" ás petroleiras e descarta tocar impostos sobre carburantes
Descarta tamén a petición de Feijóo de recorrer ao Exército para paliar os efectos do conflito do transporte.
Por E.P. | MADRID | 24/03/2022 | Actualizada ás 11:17
A ministra de Facenda e Función Pública, María Jesús Montero, afirmou este xoves que, na actual conxuntura de elevados prezos de electricidade e carburantes, as compañías eléctricas e as petroleiras "teñen que contribuír á solución final e achegar". No caso das petroleiras e no marco do conflito do sector do transporte, Montero explicou que o Goberno lles pediu un "esforzo" para que axuden a bonificar o gasóleo, sobre todo no uso profesional, para poder rebaixar o prezo do combustible.
E no que respecta ás eléctricas, sinalou que hai que "minimizar" os chamados "beneficios caídos do ceo" para que os prezos da electricidade sexan "reais" e "non se vexan artefactados" pola cotización do gas dentro do 'pool'. Montero, en declaracións a Antena 3 recollidas por Europa Press, mostrouse convencida de que na reunión deste xoves cos transportistas se chegará a un acordo para rebaixarlles o prezo do combustible e devolver a normalidade ao sector.
A ministra explicou que o que expuxo o Goberno non é unha rebaixa da fiscalidade dos carburantes para uso profesional porque o IVE e o Imposto sobre Hidrocarburos se atopan xa "no mínimo", senón que se propuxeron axudas directas (bonificacións) para baixar o prezo do combustible.
Os detalles da proposta do Goberno, que o luns ofreceu 500 millóns de euros para bonificar o gasóleo profesional, daranse na reunión deste xoves co sector do transporte, aprobarase o próximo día 29 e entrará en vigor o 1 de abril.
Preguntada polas razóns polas que o Executivo está a tardar en dar unha resposta aos problemas que están a ter diferentes sectores económicos pola alza dos carburantes, a ministra sinalou que, antes de aprobar nada, hai que dialogar con todos eles para que as medidas sexan eficaces.
En canto a por que non sentan á mesa de negociación do sector do transporte á plataforma que convocou o paro indefinido no sector, Montero insistiu en que o Goberno se está reunindo con quen son os representantes "lexítimos" do transporte, o Comité Nacional do Transporte por Estrada (CNTC), que representa o 90% do sector. "Esas son as regras de xogo e hai que respectalas. Facer o contrario rompería as regras de xogo democrático", indicou.
Respecto da actuación dalgúns piquetes neste conflito, Montero dixo é que consciente de que hai transportistas que se senten "coaccionados" á hora de sacar o seu camión e asegurou que, "desde o primeiro día" do paro, o Ministerio do Interior despregou máis de 24.000 axentes. "Pero a capilaridade do sector do transporte fai que non se poida chegar a todas partes. Eu espero que co acordo de hoxe se respecte o acordado e non se recorra a fórmulas violentas", subliñou a ministra.
Montero descartou a petición do novo líder do PP e presidente da Xunta de Galicia, Alberto Núñez Feijóo, de recorrer ao Exército para paliar os efectos do conflito do transporte porque iso suporía a interrupción das negociacións co sector. "Non é a parte mollar deste conflito, a parte mollar é que se garanta o traballo a quen queira facelo e a obrigación do Goberno é conseguir un acordo dialogado co sector", subliñou.
UNHA "PERCHA LEGAL" PASA SACAR O GAS DO 'POOL'
Respecto da reunión do Consello Europeo que arrinca este xoves e na que se abordarán medidas para conter os prezos da electricidade, a ministra de Facenda afirmou que do resultado deste Consello "dependerá en gran parte" a capacidade efectiva que teña o Goberno español de rebaixar o prezo da electricidade.
"Ten que existir unha percha legal para sacar o gas do 'pool' ou polo menos topar ese prezo para que non contamine o resto de prezos da enerxía", apuntou Montero, que recoñeceu que, a pesar da suspensión e a rebaixa de impostos á electricidade, o "sentir" da cidadanía é que isto "non se nota" na factura.
Montero fixo fincapé en que o presidente do Goberno, Pedro Sánchez, leva toda a semana "tentando convencer" os líderes políticos europeos da necesidade de cambiar a regulación do sector eléctrico e mostrou a súa confianza en que, do Consello Europeo, saia un acordo que permita rebaixar os prezos.
