Yolanda Díaz: "non é o momento de despedir nin de baixar salarios"
A ministra pon o foco sobre os "beneficios récord" das empresas do Ibex 35 e advirte: "o esforzo ha de ser colectivo".
- Yolanda Díaz rexeita etiquetar como extrema dereita aos transportistas: "Cónstame que son os máis vulnerables"
- A vida afogada en facturas eléctricas: "Ou pago a luz ou lle dou de comer ás miñas crianzas"
Por Europa Press / Redacción | SANTIAGO DE COMPOSTELA | 24/03/2022 | Actualizada ás 12:25
A ministra de Traballo e Economía Social, Yolanda Díaz, esgrimiu este xoves no Congreso un ano de beneficios récord entre as empresas cotizadas para evitar despedimentos e rebaixas de salarios como resposta á crise económica provocada pola invasión rusa de Ucraína. "Non é momento de despedir e non é momento de baixar salarios", asegurou, preguntada polas propostas de Unidas Podemos para afrontar a situación de crise, lembrando que o uso de fórmulas alternativas, como a dos ERTE, é o que "deu resultados na crise anterior".
Así mesmo, sinalou que as empresas do Ibex-35 presentaron o ano pasado uns beneficios récord de 64.000 millóns de euros. "Ninguén entendería que, nunha situación de crise, con eses beneficios, baixasen salarios. O esforzo ha de ser colectivo", reivindicou. Ademais, lembrou que o mecanismo que dá continuidade ao esquema de protección ao emprego dos ERTE deseñado na reforma laboral "xa está dispoñible", polo que pediu a empresas e traballadores "calma e tranquilidade".
Doutra banda, Díaz defendeu tamén medidas para a contención das subas do aluguer, xa que a lexislación actual prevé a posibilidade de revalorizacións destas rendas atendendo á evolución da inflación, que nestes momentos rexistra os seus maiores aumentos en 30 anos. Sinalando que o acceso a unha vivenda e o prezo do aluguer é unha das maiores dificultades para as familias, Díaz indicou que unha revalorización do IPC nestes momentos suporía "un empobrecemento xeralizado".
