Por E.P. | SANTIAGO DE COMPOSTELA | 05/04/2022 | Actualizada ás 12:08
O Delegado do Goberno, José Miñones, asegurou este martes que Galicia está "sen un presidente da Xunta á fronte" e urxiu a substitución de Alberto Núñez Feijóo á fronte do executivo galego alegando que a comunidade precisa un goberno "que estea a pensar na execución e non pensando na sucesión".
En resposta a preguntas dos medios nun acto en Santiago, Miñones asegurou que "estas últimas semanas" a Núñez Feijóo se lle escoita "falar sobre temas de Madrid, temas nacionais", e "non falando como presidente da Xunta" sobre "resolver os problemas e necesidades que ten Galicia".
"É evidente que estamos sen un presidente da Xunta á fronte nestes momentos de máxima dificultade que acabamos de atravesar", dixo o delegado do Goberno, en referencia ao paro de transportistas e ás consecuencias da guerra en Ucraína. "É unha situación que non se pode prolongar no tempo", engadiu.
Entre as cuestións que urxen, Miñones apuntou cara á "oportunidade única" que supón para a comunidade a execución de fondos como os do Plan de Recuperación. "E, para aproveitar ese reto, necesitamos unha Xunta que estea a pensar na execución e non pensando na sucesión", sinalou.
Do mesmo xeito, comprometeu que a Delegación será "sempre leal" á Xunta, "como se mantivo ao longo dos anos". "Sexa quen sexa o presidente, imos seguir colaborando no interese común que é Galicia", resolveu Miñones, á vez que afeou que esa "lealdade institucional non fose correspondida en moitas ocasións por parte do presidente e dos conselleiros".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.