Un xulgado recoñece a unha traballadora do Parador de Monforte o dereito a modificar o horario para coidar a súa filla

O xulgado do social número 2 de Lugo recoñeceu o dereito a unha traballadora do Parador de Monforte a modificar o seu horario e reducir a súa xornada para coidar a súa filla menor.

A sentenza, asinada o pasado 28 de marzo e que é firme, concede á traballadora o dereito a modificar o seu horario para estender a súa xornada de 10,00 a 17,00 horas de luns a domingo. Ademais, condena a Paradores a abonar 1.500 euros por danos morais.

A empregada do Parador de Monforte acudira aos xulgados para reclamar á empresa pública de hostalaría o mantemento da xornada que realizaba desde o seu regreso dos permisos de maternidade e lactación. Con todo, a compañía cinguía o cumprimento deste horario ao período entre domingo e xoves, e obrigaba a traballadora a acudir de 11,00 a 18,00 horas os venres e os sábados.

O xulgado concede agora o dereito a realizar de forma íntegra o horario á traballadora, representada pola Central Sindical Indepediente e de Funcionarios (CSIF), xa que non considera acreditada a imposición deste horario e si as razóns que motivan a necesidade da empregada a axustar a súa xornada para coidar da súa filla de catro anos.

"A traballadora acreditou as razóns que lexitiman a súa posición, e que deberían prevalecer sobre a potestade organizativa empresarial, ao ter un fillo menor de 12 anos e non ten a ninguén que o poida atender a esa hora, sendo necesario contratar a unha persoa para poder atender a menor, polo que a demanda debe ser estimada", resalta o fallo xudicial.