'Do rosa ao violeta': as docentes que loitaron nos 90 por erradicar o sexismo nas aulas
É a nova entrada do 'Álbum de Galicia', unha colección dixital de biografías presentada polo Consello da Cultura Galega.
Por E.P. | SANTIAGO DE COMPOSTELA | 13/04/2022 | Actualizada ás 14:14
'Do rosa ao violeta' conformou a nova entrada do 'Álbum de Galicia', unha colección dixital de biografías presentada polo Consello da Cultura Galega. En concreto, trátase dun grupo de docentes de diferentes niveis educativos da provincia da Coruña que traballan para erradicar a presenza do sexismo nas aulas galegas, segundo lembrou o Consello da Cultura Galega nun comunicado.
A entrada foi elaborada polo propio colectivo e nela realizaron un repaso pola súa historia. Durante a súa vida, encargáronse da elaboración de publicacións; formación do profesorado para a detección do sexismo nas aulas a través de xornadas, seminarios ou cursos; e conferencias organizadas por asociacións pedagóxicas, colectivos feministas, sindicais e ANPAS.
Ademais, a entrada está acompañada de varios documentos e unidades didácticas que este colectivo elaborou, entre eles 'Coeducar xogando'. É unha unidade didáctica sobre o xogo e o xoguete elaborada na década de 1990, que partía dunha enquisa previa en educación de infantil e primaria.
'Coeducar xogando' presenta unha análise crítica do lugar ocupado polos xogos e xoguetes na reprodución de roles de xénero segregados segundo sexos. Por outra banda, realiza unha proposta de actividades concretas co obxectivo de contribuír a cambiar as situacións discriminatorias ligadas ao sistema de sexos.
ÁLBUM DE GALICIA
O 'Álbum de Galicia' é unha colección dixital de biografías de persoas que destacaron en diversos ámbitos. A súa idea é dar visibilidade e perspectiva de conxunto a numerosas mulleres e homeS que axudaron de maneira significativa á sociedade galega.
As biografías do 'Álbum de Galicia' están enriquecidas con material documental, referencias bibliográficas e contidos multimedia para coñecer a obra das persoas divulgadas. Ademais, permite explorar a presenza das persoas biografiadas nos fondos documentais dixitalizados do Consello da Cultura Galega.
