Cascudas na cociña do Hospital Xeral de Vigo
O SERGAS admite o problema pero asegura que xa contratou a unha empresa para rematar cos insectos. Os sindicatos relacionan este problema de hixiene cos recortes nas subcontratas e a construción dun novo centro sanitario usando financiamento privado.
Por Galicia Confidencial | Vigo | 21/06/2014 | Actualizada ás 13:00
O sindicato CIG-Servicios de Vigo denunciou este venres que "os recortes do PP na sanidade pública están a afectar a pacientes e usuarios e provocan situacións como a presenza de cascudas na cociña do Xeral".
Neste senso, a central argumenta que a a cada vez maior precarización das contratas, cunha rebaixa do prezo das concesións de entre un 10 e un 20%, está a afectar ás condicións sanitarias dos hospitais, “tal e como proba a recente aparición de cascudas no hospital Xeral, primeiro na bandexa dun paciente e despois na propia cociña”.
O SERGAS reaccionou admitindo o problema no Complexo Hospitalario Universitario de Vigo (Chuvi), pero asegurando que está baixo control. A Administración Pública admitiu que o Servicio de Medicina Preventiva detectou "algunha" cascuda no soto do centro sanitario. A Xunta di que xa mandou contratar a unha empresa especializada para solventar o problema, que a desinfección se fixo a semana pasada e que segue pendente da aparición de máis insectos.
As cascudas son en realidade un síntoma dun conflito laboral na área sanitaria de Vigo. A Xunta está a construír un novo hospital, tirando de financiamento privado. A cambio de asumir parte do custe, as construtoras quedaranse coa xestión dos servizos do novo centro sanitario como, por exemplo, a cociña.
Salvo no servizo de limpeza, non está nada claro que os traballadores das contratas que operan hoxe no Hospital Xeral poidan facelo tamén no novo hospital.
