Por E.P. | Santiago de Compostela | 21/04/2022 | Actualizada ás 19:16
As obras da rúa do Hórreo de Santiago de Compostela tiveron que ser paralizadas porque o proxecto inicial non contemplaba a instalación de semáforos nunha actuación sobre unha das principais arterias de comunicación da cidade. Así o confirmou o alcalde compostelán, Xosé Sánchez Bugallo, quen detallou que os traballos se atopan na súa última fase, pero teñen que ser suspendidos ata a aprobación dun proxecto complementario ao inicial.
O motivo é a ausencia no proxecto da instalación de semáforos nunha rúa que actúa como vía de entrada ao Ensanche compostelán e que enlaza coas avenidas de Lugo e Romero Donallo, dúas das arterias de comunicación máis transitadas da capital galega.
Segundo Bugallo, a obra está "practicamente" concluída, con "algunhas cousas moi pequenas" pendentes de remate. Con todo, é necesaria a súa suspensión ata que se inclúa a "semaforización" do proxecto.
"A única dificultade é que hai que aprobar un proxecto complementario para incorporar a semaforización e unha serie de elementos que non estaban previstos no proxecto inicial", sinalou o rexedor santiagués sobre unha obra cuxa finalización estaba fixada para este xoves 22 de abril, un mes despois do previsto.
Tamén se referiu a outra das actuacións en marcha na cidade, a remodelación dos Concheiros, pendente de concluír tras meses de atraso. Neste caso, Bugallo tamén sinalou que restan "tarefas de pulido, de remate" e a colocación de sinais.
"Historicamente está demostrado que se ven moito mellor as obras desde unha terraza que traballando nelas", espetou o alcalde, que asegurou que os veciños dos Concheiros non lle trasladaron "ningunha" queixa polos atrasos na actuación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.