Persoal do Psiquiátrico de Conxo protesta pola falta de medidas de seguridade no centro

Persoal do Hospital Psiquiátrico de Conxo concentrouse este xoves fronte ao centro para denunciar os episodios de violencia laboral sufridos no hospital e reclamar un Plan Funcional, medidas de seguridade e un Plan de Humanización do Sergas que "facilite a atención e coidado das persoas con enfermidades mentais".

Fixérono, segundo explicou nunha comunicado CIG-Saúde, con motivo do Día Mundial da Seguridade e a Saúde no traballo. Tal e como explicou no discurso da concentración a representante do sindicato Irene Tato, "do último Informe anual de episodios de violencia laboral externa rexistrados no Servizo Galego de Saúde, a área sanitaria de Santiago é a que máis violencia laboral rexistra, nomeadamente nas unidades UAE e 1BM, que son as máis afectadas".

"A pesar destes resultados, a Xerencia mostra pasividade na planificación da priorización de toma de medidas preventivas, medidas organizativas, medidas médicas e medidas estruturais que se precisan", censurou. Neste sentido comentou a falta de protocolos para pacientes con especial agresividade e de plans individualizados centrados nun tratamento rehabilitador "para conseguir a maior funcionalidade, autonomía e reinserción posible".

No que respecta ao Plan Funcional, a representante sindical denunciou que o hospital aínda carece dun no que "se definan as diferentes unidades e servizos, os recursos materiais e humanos necesarios, tendo en conta todas as categorías profesionais e establecendo cocientes de seguridade paciente/persoal, con definición de funcións e plans de formación, entre outros, avalados polo Plan de Garantía de Calidade e Seguridade da área.

ESTADO ESTRUTURAL DO CENTRO

Entende que é "imprescindible" este plan para "garantir" unha asistencia sanitaria "segura e de calidade". Sobre o estado estrutural do centro, afirmou que "segue nos anos 80 por falta de mantemento". "Descoñecemos a creación do plan de adaptación para a mellora estrutural que tanto prometeu a Xunta". Aseguran ademais que chove "máis dentro que fóra" e que as xanelas filtran frío e choiva, as paredes se descorchan e os azulexos caen mentres o persoal ten que traer o polar da casa".

Por último, o sindicato censurou tamén o "esquecemento" do Plan de Humanización do Sergas, "que non ofrece os soportes sociosanitarios e extrahospitalarios apropiados". "Só implantar medidas caóticas de traslados de pacientes a lugares non preparados para o coidado e atención de persoas con doenzas mentais graves, moitas delas obrigadas a abandonar o que foi o seu fogar durante décadas sen un tratamento emocional apropiado e que acaban regresando coas súas patoloxías agravadas", conclúen.

Protesta do persoal do Hospital Psiquiátrico de Conxo | Fonte: CIG-Saúde