Parte de Ferrol o buque 'Cantabria' para despregarse cun dos grupos da OTAN
Dará apoio loxístico a buques da Alianza Atlántica no Mar Mediterráneo
Por E.P. | SANTIAGO DE COMPOSTELA | 02/05/2022 | Actualizada ás 18:59
O Buque de Apoio en Combate (BAC) 'Cantabria' partiu sobre as 10,00 horas deste luns, 2 de maio, das instalacións de Navantia Ferrol, onde ten a súa zona de atracada, para integrarse durante os dous próximos meses, ata finais de xuño, no grupo permanente da OTAN número 2, en augas do Mar Mediterráneo. O acto de despedida estivo presidido polo comandante da 31ª Escuadrilla de Superficie, o capitán de navío Gonzalo Leira Neira.
"Mantemos o grao de alistamento ordenado pola Frota en cada caso, pero agora mesmo non temos previstos novos despregamentos", afirmou minutos antes da partida do buque da Armada Española. Ademais, tamén destacou que tamén hai a día de hoxe xa hoxe outra fragata con este grupo naval, a 'Blas de Lezo', tamén con base en Ferrol, e detallou que "as unidades desta Escuadrilla están listas no caso de que sexa necesario o seu despregamento".
ALISTAMENTO
Pola súa banda, o comandante do 'Cantabria', o capitán de fragata Alberto Torres, manifestou que "a dotación está con moita ilusión para afrontar este novo despregamento, o segundo que facemos tras o materializado no segundo semestre do ano pasado". Neste sentido, indicou que "toda a dotación realizou un gran esforzo para manter o nivel de alistamento máis alto que se lles esixe para poder participar en operacións".
O máximo responsable do buque militar incidiu en que están "ilusionados coa contribución que realizarán á forza naval, ao resto de buques da OTAN que están na agrupación, en especial á compañeira Blas de Lezo". Así, teñen previsto desenvolver "moitos labores de apoio, que son propios" da súa "misión" e dun buque como é este, de "aprovisionamento en combate".
