O Goberno nega que as depuradoras de Cambados estean en risco: "Non entendemos este balbordo"

A directora xeral da Costa e o Mar do Ministerio para a Transición Ecolóxica, Ana María Oñoro, asegurou que tres depuradoras de marisco de Cambados "non teñen nada que temer" sobre a súa futura localización en relación co informe de Costas achega do plan especial do porto de Tragove.

"Non entendemos por que se xerou este balbordo por este informe nin tampouco que interese pode haber en xerar inquietude sen fundamentarse en feitos que así o xustifiquen", afirma Oñoro en declaracións remitidas aos medios.

Esta semana, a conselleira do Mar, Rosa Quintana, avanzou que a Xunta recorrerá aos tribunais se se expulsa estas tres depuradoras do porto de Tragove e avisaba dunha ameaza para o resto de instalacións en depósitos galegos.

"Todo aquilo que levamos dicindo desde 2019 e polo que nos chamaban alarmistas vemos que é unha realidade. Diciamos que viña o lobo e acusábannos de mentir, pero vemos que o lobo xa está aquí", criticaba a conselleira. Igualmente, o pleno de Cambados mostrou o seu apoio a estas instalacións cunha resolución.

Pola súa banda, a directora xeral da Costa e o Mar sostén que "absolutamente non" hai risco para esas depuradoras ao ser explotacións vinculadas ao mar, "simplemente é necesario que no plan que está a elaborar o Concello quede perfectamente xustificada a súa localización nese espazo".

"É necesario aclarar que o informe que xerou este balbordo é un informe de natureza urbanística que se refire ao plan especial do porto e que non ten ningunha relación nin se refire de maneira específica a ningunha explotación nin ningunha concesión", incide Oñoro.

CONVERSACIÓN CO ALCALDE

Igualmente, o alto cargo do Ministerio explica que mantivo unha conversación co alcalde de Cambados, o socialista Samuel Lago, para explicarlle que o informe que se emitiu pola Dirección Xeral da Costa e o Mar sobre o plan do porto "en absoluto implica que as tres depuradoras de mariscos alí situadas teñan que abandonar os terreos de dominio público do porto".

"Cremos que o alcalde entendeu as indicacións que se lle deron para poder proseguir coa elaboración do plan", di. No entanto, ponse á súa disposición para aclarar calquera dúbida. Oñoro remarca que esas tres instalacións son compatibles coa lexislación de Costas "a condición de que" a súa localización "estea ben xustificada".

Finalmente, defende que o Goberno central apoia "constantemente" o sector do mar. Proba diso son as "máis de 30 prórrogas" concedidas ao sector mar-industria desde 2018, dado que "non se denegou ningunha prórroga" en Galicia.

A conselleira do Mar, Rosa Quintana, en Cambados | Fonte: mispeces.com