Ferrol busca máis apoios para a candidatura a Patrimonio Mundial

O alcalde de Ferrol, Ángel Mato (PSOE), destacou este xoves a organización o próximo 19 de maio da segunda edición dun congreso de Patrimonio Histórico nesta cidade, que "suporá reunir a expertos e especialistas neste tema, que profundarán na proposta".

Así o explicou durante a presentación do congreso 'Ferrol, destino Patrimonio Mundial', un evento que terá lugar no Teatro Jofre desde das 10,30 horas do próximo xoves e ao que as persoas interesadas poderán acudir de maneira gratuíta e sen necesidade de retirar entrada. Ademais, poderá seguirse vía streaming.

O alcalde, que estivo acompañado pola concelleira de Patrimonio Histórico, Eva Martínez, detallou que o Concello "lle dá así continuidade a unha cita fundamental" para a candidatura 'Ferrol, Porto da Ilustración' a Patrimonio Mundial.

O rexedor reiterou que "lograr o recoñecemento da Unesco é unha das liñas de traballo máis ambiciosas deste goberno no que se refire ao patrimonio" e asegurou que "o goberno avanzou moito neste tempo, lanzando unha nova marca, tamén unha nova web con toda a información da candidatura", accións de rúa e "preto de 5.000 adhesións".