O BNG quere unha “demostración de forza” o 25X a prol da soberanía
“O dereito a decidir non é só unha aspiración política, é a mellor ferramenta para loitar contra o paro, a emigración e a miseria”, di Bieito Lobeira.
Por Galicia Confidencial | Compostela | 11/07/2014 | Actualizada ás 16:46
“En Pé por Galiza! Soberanía, democracia e dereitos” é o lema da campaña elixida polo BNG para celebrar o vindeiro 25 de xullo en Compostela. Unha data que os nacionalistas queren converter nunha “demostración de forza” a prol da soberanía.
E é que o BNG iniste en que unha Galicia independente pode resolver os principais problemas que lle afectan aos cidadáns. “Reclamar o dereito a decidir de Galiza non é só unha aspiración política é unha necesidade para combater do mellor xeito o desemprego, a explotación no posto de traballo, a emigración, o empobrecemento, a situación de miseria que se da no país, os dramas humanos que padecen milleiros de galegos e galegas. Para iso fai falla soberanía, é a mellor arma que temos para enfrontar desde Galiza estes problemas da sociedade”, argumentou o secretario de Organización Bieito Lobeira.
E, con esta reivindicación, os nacionalistas queren “encher” a Quintana para denunciar a “submisión” de Feijóo ás “estratexias recentralizadoras de Madrid”. “Que Galiza conte dependerá tamén da capacidade de presión social do noso país nunha cita como a do 25 de xullo”, alegou Lobeira.
Este ano cumpriranse 30 anos da tradicional manifestación que o BNG realiza o 25 de xullo. Unhas manifestacións que, desde hai uns anos, comparte con outras formacións nacionalistas e independentistas. Por iso, a secretaria de Imaxe e Campaña, Paula Prado, apelou aos “miles e miles de galegos e galegas que non están dispostos a renderse, a tirar a toalla” a mobilizarse na manifestación do Bloque para evitar que Galiza “pase a segunda división”.
A esta manifestación do 25 de Xullo, como é tradicional, asistirán delegacións doutras organizacións políticas das nacións sen estado en Europa.
