Baltar volve protexer a Jácome e rexeitará a moción do PSOE para sacalo da alcaldía
Inimigos acérrimos noutra era, Baltar e Jácome manteñen un apoio mutuo tras o polémico acordo das municipais de 2019.
- Jácome esquiva a moción de censura e manterase na alcaldía tras o silencio do PP
- Jácome golpea unha sindicalista na folga do transporte urbano de Ourense
- Baltar cualifica de "performance" o intento de reunión entre PSdeG e PP en Santiago para falar sobre Jácome
Por Europa Press / Redacción | SANTIAGO DE COMPOSTELA | 24/05/2022 | Actualizada ás 13:43
O presidente a Deputación de Ourense, Manuel Baltar, avanzou que o pleno extraordinario convocado para este mércores, 25 de maio, rexeitará a petición dos socialistas galegos para que se debata a dimisión e reprobación do rexedor municipal e deputado provincial, Gonzalo Pérez Jácome, por "agredir verbal e fisicamente" a unha muller sindicalista "nunha actitude violenta e impropia dun representante dos veciños".
Os nove deputados que integran o Grupo Socialista na Deputación de Ourense forzaron a celebración dun pleno extraordinario no órgano provincial para abordar esta cuestión, xa que constitúen o mínimo, un cuarto do total de membros do pleno, para a convocatoria.
Baltar mostrouse claro neste aspecto: "Xa se sabe cal vai ser o resultado do pleno". E é que "rexeitará" a iniciativa do Partido Socialista e a sesión plenaria "resolverase en menos dunha hora", asegura, para que o PSOE "se poña a traballar noutra nova iniciativa co mesmo resultado e coa mesma autoridade que o pleno de mañá".
O presidente provincial explicou que o motivo de votar en contra da petición dos socialistas é que, con independencia do contido, os plenos da institución e, "por suposto os plenos extraordinarios", deben ser "para cuestións que teñan que ver co desenvolvemento das competencias provinciais que non fosen tratadas en cámara de representación política anteriormente". Evitou así facer unha defensa explícita de Jácome, de quen dependen para se manter como presidente da Deputación despois do polémico acordo tras as municipais de 2019.
Neste sentido, manifestou que este asunto xa foi tratado no pleno do Concello de Ourense. Ademais esgrimiu que o PSOE "non pode pretender" que o grupo de goberno da Deputación "entenda a súa filosofía de traballo" que consideran "completamente errónea".
"Estamos a xulgar a un alcalde por un comportamento que xa dixemos o que nos parecía. Tanto a portavoz do partido no concello como eu mesmo como o partido en si dixemos como debería terminar esta cuestión: cunha petición de desculpas", manifestou Baltar, quen lamenta que "non se fixo ata o de agora", pero "os mecanismos que existen nas institucións ou corporacións como a Deputación están para asuntos como gobernar".
Deste xeito, insistiu en que o resultado do pleno deste mércores é "archisabido" porque "existe unha maioría que se pronuncia, que ten uns argumentos e que mañá exporá o portavoz do Grupo Popular". Tamén "dirá algo respecto diso" a deputada non adscrita e o portavoz de Democracia Ourensá e "resolverase democraticamente cun resultado evidente".
