O Goberno central, "decidido" a construír a liña de alta tensión en Arbo porque ten "garantías ambientais"

O Goberno de España "está decidido" a levar adiante a construción da liña de interconexión eléctrica con Portugal, que pasa, entre outros, polo concello fronteirizo de Arbo, e subliñou que o proxecto conta con "todas as garantías ambientais".

Así o trasladou a subdelegada do Goberno en Pontevedra, Maica Larriba, nun encontro mantido este venres co alcalde de Arbo, Horacio Gil, no que lle lembrou que o trazado elixido "é o máis adecuado para salvagardar, entre outros, o espazo do Miño protexido na Rede Natura 2000 e as zonas de especial protección de aves (ZEPA), ademais de cumprir de maneira absolutamente rigorosa toda a lexislación aplicable a este tipo de instalacións".

Esta liña de alta tensión, abundou Larriba, superou unha Declaración de Impacto Ambiental "moi estrita", cunha tramitación de máis de dous anos, e tivéronse en conta "todas e cada unha das alegacións presentadas polas diferentes administracións".

A subdelegada do Goberno manifestou que entende "a preocupación" que poida espertar o proxecto nalgúns veciños, pero puntualizou que o proxecto xa se iniciou en 2011, que foi acordado con Portugal e que se executará porque "non só é unha liña de interese e utilidade nacional, senón que está dentro dun plan a nivel europeo de interconexións eléctricas".

Finalmente, subliñou que terá "a mínima afección posible ao territorio" e que, no caso de Arbo, as dúas torres que se instalarán estarán a máis de 80 metros de distancia da vivenda máis próxima.

Mentres, os alcaldes de Arbo e As Neves, e os das localidades portuguesas de Melgaço e Monçao manteñen a súa oposición ao proxecto, "que afecta gravemente os intereses veciñais" dos catro concellos.

Así, o próximo 29 de maio está prevista unha concentración-manifestación ás 18,00 horas, organizada pola asociación de afectados e que terá lugar en Valiñas-Poste (Barcela-Sela), na que participarán representantes municipais dos catro concellos.