Por E.P. | SANTIAGO DE COMPOSTELA | 28/05/2022 | Actualizada ás 14:50
O PPdeG lanzou en redes sociais a campaña #1proxecto313obxectivos, como punto de partida para alcanzar "un magnífico resultado" nas eleccións municipais do próximo ano.
Así, a secretaria xeral, Paula Prado, pediulles aos seus compañeiros do partido, través dun vídeo, que "se fagan á idea" de que quedan 365 días para os comicios locais e que "cada día ten que ser un exame" para alcanzar "un magnífico resultado o 28 de maio de 2023".
Prado destacou que o PP ten "313 obxectivos" e que os alcanzarán "cos mellores candidatos, cos mellores equipos e cun proxecto común". "Na noite electoral esperamos ter 313 boas noticias", remarcou, en referencia ao mesmo número de concellos galegos.
Así, tras a celebración este venres do primeiro Comité Executivo despois do Congreso autonómico, Paula Prado sinalou que a súa formación representa "a moderación, a estabilidade e a unidade" que, ao seu xuízo, "piden os galegos".
"Sentimos que Galicia segue confiando en nós tras un proceso de cambio e cun novo presidente. O Partido Popular segue sendo o partido que máis se parece a Galicia e somos o único que ten os pés na terra", subliñou.
Neste sentido, a secretaria xeral mostrouse "ilusionada" coa "nova etapa do Camiño" que, continuou, "ten a meta nas municipais", nas que augura que o PPdeG "sairá lanzado a pola quinta maioría absoluta na Xunta" e engadiu que o seu partido "non ten teito".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.