Por E.P. | Santiago de Compostela | 02/06/2022 | Actualizada ás 20:42
O presidente da Confederación de Empresarios de Galicia (CEG), Juan Manuel Vieites, reclamou ao Goberno central que "acelere" a execución dos fondos Next Generation, xa que "tan só un de cada catro euros chegaron ás empresas". Unha idea na que coincidiu o vicepresidente primeiro da Xunta, Francisco Conde, quen insistiu nunha repartición "áxil", "transparente" e en "igualdade de condicións".
Así se expresaron no acto de clausura da Asemblea Xeral da patronal galega, na que se aprobaron as contas de 2021 e o orzamento do ano vixente.
No seu discurso, Vieites esixiu que se "reduza a carga burocrática para acceder" aos Next Generation, á vez que o Estado "estableza prazos razoables e realistas para presentar os proxectos", dado que se non, córrese o risco de que boa parte do empresariado quede fóra.
Nesta liña, Francisco Conde queixouse do risco de que estes fondos europeos non cheguen a sectores como o da automoción galega ou as pemes.
De tal forma, o responsable da patronal galega advirte da "complicada situación que viven as empresas", por mor de problemáticas como a pandemia, a crise de subministración e a inflación. Unha cuestión "agravada e peor que as do resto de Europa a colación dunhas decisións desacertadas do Executivo (central) e unhas evidentes debilidades estruturais da economía" que se deben afrontar "con prema".
Entre outros retos, referiuse a a reindustrialización, a dixitalización, a transición ecolóxica e a sistematización da innovación.
Igualmente, Vieites emprazou a Conde a traballar para conseguir o obxectivo de que a industria supoña o 20% do peso do PIB de Galicia.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.