O 73,87% dos salarios galegos son do sector servizos e baixan a industria e o sector primario
O peso dos salarios sobre o PIB en Galicia baixa ao 45,5% en 2021, dous puntos menos que a media española e europea
Por Europa Press / Redacción | SANTIAGO DE COMPOSTELA | 03/06/2022 | Actualizada ás 10:47
O peso dos salarios representa o 45,5% do PIB de Galicia, o que supón unha caída dun punto porcentual respecto de 2020, segundo os datos que publica o Instituto Galego de Estatística (IGE) este venres.
Esta taxa é dous puntos inferior á media española (47,5%) e da Unión Europea (47,8%). Tamén a remuneración do factor traballo perdeu peso no último ano tanto na economía española como europea. Este indicador alcanzou o seu valor máximo en Galicia no ano 2009, no que se situou no 48% do PIB.
Pola súa banda, a remuneración por hora asalariada en Galicia en 2021 alcanzou os 19,5 euros, o que se traduce nunha alza dunha décima respecto dos 19,4 euros de 2020. Con todo, supón só o 78% da remuneración media na Unión Europea, que é de 25,1 euros (crece dúas décimas).
O diferencial da comunidade galega coa UE chegou a acurtarse ao 81% en 2009, pero desde entón volveu ampliarse a diferenza. Ademais, o dato de Galicia tamén está case dous euros por baixo do dato de España (21,3 euros).
En Galicia, o 73,87% dos salarios correspóndese co sector servizos. A máis distancia están: industria (17,10%), construción (6,7%) e sector primario (2,3%). Nas dúas últimas décadas o peso da industria non deixa de descender, mentres a construción redúcese desde o 2007 e o sector servizos crece.
As ramas con maior remuneración por hora na comunidade galega son administración pública e defensa (27,6 euros), información e comunicacións (26,7 euros), así como actividades financeiras e seguros (26,66 euros).
