O alcalde de Ourense confirma a súa intención de volver presentarse á reelección

O rexedor municipal de Ourense, Gonzalo Pérez Jácome, recoñece a súa intención de volver presentarse ás eleccións municipais en maio do próximo ano. Así o fixo saber o propio alcalde ante os medios de comunicación tras presentar a programación das festas de Ourense.

"Iso é como as datas das festas, pode haber variacións e pode haber cambios, pero en principio xa sabedes cal é a previsión", sostivo, para apostilar que "nunca" demostrou o contrario e que será "o único candidato que se presente á reelección".

A preguntas dos xornalistas sobre o resto de candidatos e en concreto a posibilidade de que o Partido Popular presente ao que fose ex alcalde da cidade, Manuel Cabezas; Pérez Jácome non quixo entrar a valorar. "Non vou falar de candidatos que aínda son futuribles ou hipóteses", resolveu o rexedor.

DENUNCIA

Así mesmo, Pérez Jacome foi preguntado pola denuncia que a xefa da Policía Local presentou en pasadas datas por presunto acoso laboral. "Ela está de baixa e a denuncia preocúpame cero", sentenciou o alcalde.

Ademais, engadiu que "se se cre que hai algunha base" debería tamén "pensarse que hai algunha base nos 17 policías que a denunciaron a ela por acoso". "Non imos darlle credibilidade a ela e aos outros 17 policías non", agregou.

O alcalde de Ourense, Gonzalo Pérez Jácome, durante un pleno no Concello de Ourense, a 6 de maio de 2022, en Ourense, Galicia (España). O PSOE presentou durante o pleno unha moción para condenar a actuación do alcalde e esixir aos populares q. Rosa Veiga - Europa Press | Fonte: Europa Press