Por Europa Press / Redacción | SANTIAGO DE COMPOSTELA | 18/06/2022 | Actualizada ás 19:59
Un home tivo que ser trasladado despois de sufrir un desmaio mentres realizaba un tramo dunha ruta que transcorre pola estrada de Cedeira ata o Faro de Punta Candelaria.
Segundo trasladou o 112 Galicia, foi un compañeiro quen sobre as 13,30 horas deste sábado chamou á central de emerxencias para solicitar axuda. Nesta comunicación, demandaba unha ambulancia para o home, que sufrira un desmaio.
Nese momento, o Centro Integrado de Atención ás Emerxencias de Galicia (CIAE-112) deu aviso ao persoal do Servizo de Urxencias Sanitarias de Galicia-061, á Garda Civil, ao GES de Ortigueira e aos efectivos de Protección Civil.
Do mesmo xeito, informaron os Bombeiros de Ferrol por se tivesen que prestar a súa colaboración xa que, nun primeiro momento, os profesionais sanitarios indicaban que o home se atopaba nun lugar con dificultades de acceso.
Finalmente, os membros da Agrupación de Voluntarios de Protección Civil indicaron ao 112 Galicia que puideron recoller á persoa e trasladala ao centro de saúde da localidade que, tras as primeiras valoracións por parte dos profesionais sanitarios, foi evacuada ao centro hospitalario de referencia no helicóptero medicalizado que os servizos sanitarios derivaron ata o punto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.