Renfe ofrece 1.300 prazas máis nos servizos a Vilagarcía para facilitar os desprazamentos ao Atlantic Fest

Renfe ofrecerá 1.300 prazas adicionais nos seus servizos de media distancia a Vilagarcía de Arousa para facilitar os desprazamentos en tren para acudir ao Atlantic Fest. Tal como informou o operador ferroviario, os días 16 e 17 de xullo incrementará as súas prazas para que todos aqueles que queiran acudir ao evento en ferrocarril poidan facelo.

Así, Renfe ofrecerá prazas adicionais nos trens do eixo atlántico, que conectan A Coruña con Santiago, Pontevedra e Vigo, con parada en Vilagarcía, eses dous días. A compañía porá pola mañá do 16 un tren extra e outros dous trens máis á primeira hora da mañá do 17 de xullo.

Ademais, o día 16 o tren das 11,00 horas con saída de Vigo irá en dobre composición, é dicir, co dobre número de prazas.

"Renfe facilita o transporte en tren para evitar o uso do vehículo privado mediante o incremento de prazas nos seus trens de media distancia para o Atlantic Fest, como xa fixo recentemente co festival O Son do Camiño", reivindicou a empresa, que recomendou anticipar a compra a través da web ou os despachos de billetes.