O persoal temporal das residencias pide mellores condicións: "É imposible ter unha vida digna"

Persoal temporal dos centros públicos de residencias de maiores e persoas dependentes concentráronse este martes fronte á sede da Xunta en San Caetano para demandar á administración autonómica cambios nas súas condicións de traballo. Entre outros, piden que non as obriguen a coller contratos "de media xornada, de fin de semana ou de dúas horas" obrigatoriamente.

As traballadoras denuncian que se non aceptan ese tipo de contratos "as penalizan durante moito tempo". Ademais, censuran que eses contratos van ligados a salarios duns 400-500 euros cos que "é imposible ter unha vida digna".

Por iso, demandan listas independentes para poder optar entre unha xornada continua ou unha media xornada sen que os penalicen. "Hai xente que por conciliación familiar ou por estudos necesitan este tipo de contratos, pero pedimos poder elixir, do mesmo xeito que se fai no Sergas, e que non nos penalicen. É moi duro que te metan seis meses na neveira", declarou Manuel Bóveda, un dos traballadores deste colectivo.

Ante esta situación, Bóveda sinalou que moitos compañeiros optan por marchar ás listas do Sergas, xa que son técnicos en coidados e auxiliares de enfermaría e, deste xeito, engadiu, as listas de contratación para as residencias e centros de dependentes "quedan baleiras". En total, segundo Bóveda, están nesta lista de temporais "entre 500 e 600 persoas", aínda que especificou que esa cifra "non é real" porque "moitos están apuntados, pero optan polo Sergas e outros xa non están nas listas de contratación".

Sobre isto, denunciou que a Xunta ameaza con contratar a xente sen especialidade para suplir estes empregos e "abaratar o posto de traballo con xente non cualificada". Ademais, asegurou que a carga de traballo é "moi alta" e o persoal atópase "moi canso" tras a pandemia. "Nós damos o 1000x1000 e eles castígannos con contratos deste tipo", lamentou.

REUNIÓN CON RUEDA

Nesta mesma liña, Manuel Bóveda solicitou unha reunión con membros do partido de Goberno, así como co propio presidente da Xunta, Alfonso Rueda, para exporlle as súas demandas.

Así mesmo, indicou que xa se reuniron coa secretaria xeral técnica de Política Social que, segundo detallou, trasladoulles que "non pretenden crear traballadores pobres", aínda que, en todo caso, a xestión dos seus contratos é responsabilidade da Consellería de Facenda e Administración Pública.

Ademais, explicou que o colectivo enviou unha carta á Valedora do Pobo, que xa instou á Xunta a modificar as cuestións que demandan, pero, continuou, "fixeron caso omiso". "Non podemos máis", reiterou.

FOLGA

Por outra banda, avanzou que en setembro estudarán facer unha folga nas residencias, pero polo momento esperarán a que baixe a incidencia de Covid porque asegura que "está a ser bestial". "Cando isto acougue imos propor aos compañeiros unha folga nos centros públicos e residencias porque cremos que hai que cambiar as cousas. Non se pode vivir no século XXI con condicións de traballo feudais ou de antes da Revolución Industrial", proclamou.

Traballadores das listas temporais de residencias públicas de maiores e de persoas dependentes de Galicia maniféstanse ante a sede do Goberno galego en San Caetano, Santiago de Compostela. | Fonte: Europa Press