Seguen aumentando os ingresados por covid-19, até os 689, e os casos activos superan os 15.500

Os pacientes de covid-19 ingresados en Galicia volven crecer ata os 689 hospitalizados, que son 20 máis con respecto a hai 24 horas. Mentres tanto, os casos activos ascenden a 15.599 despois dunha xornada na que o Servizo Galego de Saúde (Sergas) detectou 1.632 positivos nun día.

Segundo os datos actualizados este sábado pola Consellería de Sanidade, con rexistros ata as 18,00 horas do venres, as plantas dos hospitais acumulan 667 ingresados con coronavirus, que son 24 máis que un día atrás, aínda que as unidades de coidados intensivos teñen 22, catro menos.

Por áreas sanitarias, non todas replican este ascenso dos ingresados. De feito, a área de Ferrol conta con 46 hospitalizados (oito menos que hai un día), dos que só un está na UCI (-1). Do mesmo xeito, baixan lixeiramente na Coruña a 169 (-1), dos que sete están críticos (-2); e en Santiago-Barbanza a 103 (-1), catro deles (-1) en coidados intensivos.

No lado oposto, a área de Vigo soben ata os 103 hospitalizados (+9), aínda que baixan a dous os críticos (-1); a de Ourense-Verín-O Barco de Valdeorras ascende a 99 (+10), aínda que descenden a tres os que están na UCI (-1); e en Lugo-A Mariña-Monforte aumentan a 90 (+10), dos que tres están en coidados intensivos (+1).

CASOS ACTIVOS EN ASCENSO

Por quinta xornada consecutiva os casos activos ascenden e sitúanse no conxunto de Galicia en 15.599, que supoñen 617 máis que a xornada anterior ao haber máis contaxios (1.632) que altas (1.009), ao que se suman cinco falecementos.

O aumento replícase nas sete áreas sanitarias galegas. A da Coruña-Cee é a que máis pacientes covid acumula, con 3.356 (+296), seguida da de Santiago-Barbanza con 2.820 (+103) e da de Vigo con 2.612 (+21).

Tras estas, están a de Lugo-A Mariña-Monforte con 1.984 infeccións activas (+52), a de Ourense-Verín-O Barco de Valdeorras con 1.979 (+74); a de Pontevedra-O Salnés con 1.671 (+7); e a de Ferrol con 1.156 (+64).

Pola súa banda, os novos contaxios de covid-19 experimentan unha estabilización ao descender lixeiramente ata os 1.632 detectados polo Sergas nun día, que son nove menos que os 1.641 notificados o venres.

Cabe lembrar que co novo protocolo non se contabilizan os autotest positivos e non se fan probas de diagnóstico a poboación en xeral, agás á vulnerable.¡

Dos 1.632 novos contaxios rexistrados no último día analizado, a área da Coruña acumula 341, seguida da de Santiago con 297, de Vigo con 257, de Ourense con 234, de Lugo con 213, de Ferrol con 155 e de Pontevedra con 132. A estes súmanse tres sen área sanitaria asignada.

Así, os infectados rexistrados desde o inicio da pandemia ascenden en Galicia a 649.051, dos cales 145.553 corresponden á área de Vigo; 134.351 á da Coruña; 103.609, á de Santiago; 79.293 á de Ourense; 73.970, á de Pontevedra; 71.677 á de Lugo; e 39.680 á de Ferrol.

INCIDENCIA EN GRUPOS VULNERABLES

Segundo o último informe actualizado polo Ministerio de Sanidade este pasado venres, 1 de xullo, adaptado ao novo sistema de vixilancia da covid-19 centrado en poboación vulnerable, a incidencia acumulada a 14 días en Galicia en maiores de 60 anos aumentou a 1.126,27 casos por 100.000 habitantes, mentres que a media estatal está en 996,25.

A  incidencia no grupo de idade de 60 a 69 anos en Galicia ascendeu a 14 días a 1.024,52 casos por 100.000 habitantes; no de 70 a 79 anos a 1.179,13; e no de maiores de 80 anos subiu a 1.212,86.

As vítimas da pandemia da Covid-19 en Galicia rexistradas na web do Sergas ascenden a 3.608 ao notificar este sábado a Consellería de Sanidade cinco óbitos novos de persoas con patoloxías previas.

Todos estes falecementos correspóndense co xoves, 30 de xuño. Tratábase de dous homes de 89 e 94 anos da área sanitaria de Santiago-Barbanza, dúas mulleres de 94 e 75 da da Coruña-Cee e outra muller de 90 da de Vigo.