Pontevedra estuda crear un rexistro de ADN de "cacas" de cans para sancionar aos que non as recollen

O concelleiro de Benestar Animal, Marcos Rei, anunciou este venres que o Concello de Pontevedra estuda crear un rexistro de ADN para "cacas" -feces- de cans para loitar contra a conduta de non recoller os excrementos nas rúas.

"Enriba da mesa está a alternativa de facer un censo de ADN de cans", explicou o concelleiro. "Estamos a traballar niso, pero é un pouco complicado porque hai que cambiar a ordenanza municipal", dixo, para poder obrigar aos donos das mascotas a cumprir con ese trámite.

Este censo municipal de ADN canino, un xenotipo vinculado ao chip do animal, ten como obxectivo principal loitar contra os excrementos non recollidos nas rúas, pero tamén valería para identificar os abandonos de camadas. Trátase dunha medida xa aplicada con éxito en numerosos municipios españois.

Marcos Rei desvelou esta medida na presentación da campaña de concienciación sobre a recollida de excrementos e limpeza de ouriñes das mascotas, acompañado de membros dos colectivos Os Palleiros, DivertiCans e Ohana.

CAMPAÑA

A campaña fala de "cacatúas", acrónimo composto polo substantivo "caca" e o pronombre posesivo "túa" que fai referencia ás deposiciones dos cans. Inclúe a repartición de folletos informativos, de 5.000 portabolsas para recoller as feces caninas e 3.000 botellas "non te despistes" para diluír con auga as mexadas das mascotas.

O vindeiro venres, 8 de xullo, na praza de Ourense entregaranse portabolsas e botellas e farase unha demostración de como educar aos cans.

AUMENTAN OS ABANDONOS

Nesta presentación, Gloria Cubas, presidenta da protectora de animais Os Palleiros de Pontevedra, alertou do "dramático" aumento dos abandonos durante este verán.

"Só na última quincena de xuño entráronnos 22 cans, polo que estamos un pouco máis saturados do normal", sinalou Gloria Cubas, porque "son cans que veñen sen sociabilizar" polo que necesitan un canil só para eles. A día de hoxe a protectora de Pontevedra ten preto de 90 animais e outros 25 en casas de acollida.

"MÁIS CANS QUE NENOS"

A Concellaría de Medio Ambiente ten actualmente 16.876 cans rexistrados en Pontevedra. Son mil máis que o pasado ano. Carlos Souto, un dos responsables de DivertiCans, asegura que "si que é verdade que polo censo hai máis cans que nenos".

E lamenta que "a xente cre que é máis fácil ter un can que ter un neno, porque hai menos responsabilidades, unha idea que nós estamos a tentar cambiar porque ter un can implica moitas obrigacións que se non se cumpren xeran problemas".