A ministra Raquel Sánchez recibirá a familiares do Pitanxo, que pedirán "explicacións" e "baixar ao pecio"
Por E.P. | VIGO | 13/07/2022 | Actualizada ás 12:06
Os familiares dos falecidos no naufraxio da 'Villa de Pitanxo' manterán un encontro, o próximo 26 de xullo, coa ministra de Transportes, Mobilidade e Axenda Urbana, Raquel Sánchez, á que trasladarán en persoa as súas demandas de información e a reclamación de que se baixe ao pecio para solicitar información sobre as circunstancias da traxedia, na que faleceron 21 dos 24 tripulantes do pesqueiro o pasado 15 de febreiro, a 450 quilómetros das costas de Terranova.
A portavoz das familias, María José de Pazo, confirmou que as numerosas solicitudes e chamadas para reunirse coa ministra e co propio presidente do Goberno tiveron resposta este mércores. Así, o gabinete de Presidencia contactou ás familias para informarlles de que serán recibidas por Raquel Sánchez, o próximo 26 de xullo ás 12,30 horas en Madrid.
"Pediremos explicacións, información, transparencia e a baixada ao pecio. E se (a resposta) é a negativa por parte do Goberno, que a xustifiquen e a motiven, pero con técnicos, non con medio folio con vaguedades, que é o que temos ata agora", proclamou de Pazo.
Por outra banda, os familiares prevén reunirse este xoves en Bruxelas coa Comisión de Peticións da Unión Europea (UE) e trasladarán a súa petición de que se investigue se o Goberno de España viola a normativa comunitaria sobre transparencia mediante a ocultación de información. Tamén exporán as súas alegacións para insistir na necesidade de localizar e baixar ata o pecio do arrastreiro para coñecer as causas que levaron ao barco ao fondo do mar.
