Contas detecta irregularidades nas entidades dependentes da Xunta
Pide "transparencia financeira".
Por Europa Press / Redacción | SANTIAGO DE COMPOSTELA | 01/08/2022 | Actualizada ás 11:02
O Consello de Contas pide á Xunta "transparencia financeira" das entidades nas que sexa ou ben accionista ou ben socio de referencia, aínda que non posúa a maioría de capital social, co obxectivo de que estas entidades sexan sometidas a control e supervisión pública.
Trátase dunha nova recomendación recollida no informe de fiscalización do Consello de Contas, recollido por Europa Press, e que foi entregado polo conselleiro maior de Contas, José Antonio Redondo, o pasado venres ao presidente do Parlamento, Miguel Santalices, na Cámara autonómica.
Así mesmo, no informe recóllense as recomendacións aceptadas pola Xunta pendentes de aplicación, das que Contas fai a súa recompilación. Así, lembra a necesidade de pór en marcha o rexistro das entidades, prevista na Lei de organización e funcionamento da administración xeral (Lofaxga), "tendo en conta o tempo transcorrido desde a súa entrada en vigor". Así mesmo, reclama que se establezan sistemas de identificación das entidades que poidan reunir os requisitos legais para ser considerados integrantes do sector público autonómico e dos entes adscritos.
Outras medidas pendentes son que se deposite no rexistro as contas anuais para a súa remisión ao ente fiscalizador e incluír na memoria dos organismos autónomos a información prevista no plan público, co fin de poidan "explicar, comentar e ampliar a información" dos estados contables restantes.
Tamén falta por elaborar instrucións, guías e resolucións que desenvolvan a normativa contable, en particular, desenvolver o formato e contido da información económico-financeira que deben achegar as entidades instrumentais, así como a información adicional que deben facilitar as entidades sometidas ao plan de contabilidade privado.
O informe lembra que falta por instar os entes instrumentais a fornecer información sobre o custo de actividades e indicadores de xestión como medio para avanzar na dirección por obxectivos e no control da eficiencia.
ADAPTACIÓN DE ESTATUTOS
Entre as cuestións pendentes, atópase tamén instar os consorcios e fundacións públicas nas que participe a administración a que se sinale expresamente cal é a administración de adscrición; así como ampliar ás restantes axencias, entidades públicas empresariais, fundacións e sociedades a participación da intervención xeral dean a contratación e seguimento dos traballos de auditoría de contas anuais.
Así mesmo, falta por actualizar a normativa de réxime financeiro e orzamentario en materia de control e someter a auditoría contable as contas anuais dos organismos autónomos.
