Por E.P. | SANTIAGO DE COMPOSTELA | 02/08/2022 | Actualizada ás 14:39
A portavoz nacional do BNG, Ana Pontón, desprazarase a Colombia para asistir á toma de posesión do presidente, Gustavo Petro, e a vicepresidenta, Francia Márquez, que terá lugar o vindeiro domingo 7 de agosto. Previamente, fará escala en Chile o mércores e o xoves, para manter varios encontros políticos.
Segundo informa a formación, Pontón estará acompañada na súa viaxe pola responsable da área de internacional da Executiva nacional, Ana Miranda. A súa axenda en Colombia componse de diferentes encontros con entidades e organizacións políticas. O BNG destaca a reunión co partido do futuro presidente do país, Colombia Humana.
Ademais, o Bloque traslada que participará noutros encontros coa copresidenta da Comisión de Paz e senadora María José Pizarro, e co maxistrado experto en dereitos humanos Luís Guillermo Pérez Casas.
O Bloque confía en que o triunfo da coalición colombiana Pacto Histórico supoña "profundos cambios no político, económico e social" do país. E destaca a figura de Márquez porque "supón un punto de inflexión", posto que por primeira vez unha afrocolombiana "de orixe humilde, feminista e activista ambiental" --enxalza a formación-- entra no Palacio Presidencial.
ESCALA EN CHILE
Antes da súa chegada a Colombia, Pontón recalará en Chile, país no que permanecerá entre o 3 e 4 de agosto para visitar a Elisa Loncón, presidenta da Convención Constitucional entre o 4 de xullo de 2021 e o 5 de xaneiro deste ano. Ademais, terá encontros coa alcaldesa de Santiago de Chile, Iraci Hassler, e co alcalde do municipio de Recoletos, Daniel Jadue.
O Bloque resalta a reunión con formación política Fundación Chile Constituínte coa que a Fundación Galiza Sempre asinará un acordo de colaboración. A formación aspira a que a axenda da líder nacionalista contribúa a "ampliar e reforzar" as súas relacións internacionais.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.