Incautados máis de 5.000 quilos de sardiña no porto de Laxe

O Servizo Marítimo Provincial (SMP) da Garda Civil da Coruña incautou un total 5.382 quilogramos de sardiña descargados no porto de Laxe. Os gardas civís observaron como se descargaban seis palés cun total de 255 caixas de sardiña dun pesqueiro, que foron introducidas posteriormente nun camión estacionado na chaira do porto. Pouco despois, outro pesqueiro descargaba oito palés cun total de 344 caixas de sardiña, que igualmente foron introducidas no mesmo vehículo, o cal iniciou a marcha.

A Garda Civil realizou o seguimento do camión e interceptouno nas inmediacións do porto da Coruña. Así, solicitouse ao condutor a documentación que amparaba a rastrexabilidade e o transporte da mercadoría, ante o cal se achegaron documentos que amparaban un total de 4.000 quilos.

Ante a sospeita de que o peso das sardiñas transportadas era superior ao que recollían os documentos achegados, os gardas civís indicáronlle ao condutor que se debía realizar a pesada da mercadoría na lonxa.

De tal forma, determinouse que a sardiña descargada polo primeiro barco era de 3.855 quilos, mentres que o segundo barco levaba 5.527 quilos. A Garda Civil procedeu á incautación dos 5.382 de exceso de captura, dado que o límite diario de capturas desta especie é de 2.000 quilos, ademais das correspondentes denuncias por suposta infración da lei de pesca de Galicia. As sardiñas aprehendidas foron levadas a un centro benéfico.