A Xunta pide ao Goberno a declaración de zona catastrófica polos incendios en Valdeorras e O Courel
Foron os dous lumes máis grandes dende que hai rexistros.
Por Europa Press / Redacción | SANTIAGO DE COMPOSTELA | 04/08/2022 | Actualizada ás 14:29
O Consello da Xunta acordou solicitar ao Goberno central a declaración de zona afectada gravemente por unha emerxencia de protección civil os municipios afectados a mediados de xullo polos lumes de: Folgoso do Courel, Quiroga, A Pobra do Brollón e O Incio, na provincia de Lugo; así como O Barco de Valdeorras, Carballeda de Valdeorras, Rubiá, Oímbra e Verín, na de Ourense.
Os dous maiores incendios desde que hai rexistros en Galicia, no Courel --11.100 hectáreas-- e Valdeorras --10.500 hectáreas--, quedaron extinguidos o 28 de xullo despois de dúas semanas ardendo por mor do seu inicio por raios caídos nas treboadas secas do 14 de xullo.
Con esta petición, búscase que o Goberno central complemente co seu sistema de axudas os danos causados polos lumes coa declaración coñecida como zona catastrófica. Para iso, o presidente o presidente da Xunta, Alfonso Rueda, informou de que se trasladarán todos os datos necesarios.
Respecto diso, Rueda defende que "a burocracia ten que ser a mínima posible" e pide "axilidade". Aínda que considera que esta solicitude "non era imprescindible" para que o Goberno active as axudas, "ante calquera dúbida", explica "non ter ningún problema" en levar a cabo esta solicitude.
Así mesmo, lembra que a Xunta xa convocou as axudas que poden solicitarse a través dos distintos departamentos, á vez que o presidente do Goberno, Pedro Sánchez, trasladou na súa reunión con Rueda a implicación co apoio ás zonas afectadas.
PLAN DE RECUPERACIÓN
A Xunta de Galicia constituíu este xoves unha comisión interdisciplinar co obxectivo de deseñar un plan de recuperación integral do Courel tras o gran incendio que afectou á devandita paraxe natural no mes de xullo, que calcinou máis de 11.000 hectáreas.
Na súa visita á localidade lucense de Folgoso do Courel, a conselleira de Medio Ambiente, Territorio e Vivenda, Ángeles Vázquez, subliñou a necesidade de comezar "canto antes" coas tarefas de rexeneración dos espazos naturais danados e coa tramitación das axudas para as persoas que se viron afectadas o lume.
Nesta liña, a comisión constituída este xoves estará integrada por diversos expertos en varias materias co obxectivo de que as medidas e as accións que se acometan sexan froito dunha visión e perspectivas globais.
"Trátase de non deseñar medidas illadas, senón de definir unha folla de ruta a seguir no futuro para conseguir esta recuperación", reivindicou a titular de Medio Ambiente, segundo recolle o Goberno galego nun comunicado.
LIÑAS DE AXUDAS
En canto ás liñas de axudas xa en marcha, a Xunta dispón duns fondos de 300.000 euros encamiñados a mitigar os danos causados polo lume nos terreos cinexéticamente ordenados (tecor), cun máximo de 650 euros por hectárea, cun límite máximo de 30.000 euros por entidade.
No que respecta a axudas para a rehabilitación e reconstrución de vivendas, xa está aberto o prazo para presentar solicitudes. No caso de vivendas de residencia habitual, suporán o 100% do custo, cun máximo de 122.400 euros. Se se trata dunha segunda vivenda, tamén se pagará o 100% do custo, pero ata os 61.200 euros.
"A situación á que nos enfrontamos require do esforzo de todos para abordar desde todos os puntos de vista as accións a acometer para rexenerar a Sierra do Courel", sentenciou Ángeles Vázquez.
