Dous novos incendios en Riós e Oímbra, e segue activo o gran lume de Laza
Os incendios forestais de máis de 20 hectáreas sen extinguir en Galicia soben a oito.
Por Europa Press / Redacción | Santiago de Compostela | 14/08/2022 | Actualizada ás 20:40
Dous novos incendios na provincia de Ourense --nos concellos de Riós e Oímbra-- queimaron máis de 20 hectáreas en cada un dos casos; mentres que segue activo o lume de Laza, que tras unirse co de Chandrexa de Queixa, saldouse cunha superficie arrasada de 2.100 hectáreas, segundo as estimacións provisionais.
O último parte de Medio Rural, con datos recolleitos ata as 19,30 horas, reflicte que un lume se iniciou sobre as 15,30 horas en Fumaces e a Rube, en Riós; mentres que ás 16,35 horas, nas Chás (Oímbra), iniciouse outro lume. En ambos traballan medios aéreos e terrestres para a súa contención.
En canto ao lume de Laza-Chandrexa, a Consellería do Medio Rural reafírmase que este lume se atopa xa "practicamente perimetrado" e "evoluciona favorablemente cara á súa estabilización", aínda que polo momento non se confirmou.
Por outra banda, permanece estabilizado desde as 23,47 horas o incendio iniciado a última hora da tarde deste sábado na parroquia de Torbeo, no concello lucense de Ribas de Sil que, segundo as últimas medicións provisionais, queimou unhas 40 hectáreas.
Así mesmo, na provincia de Ourense permanecen controlados os incendios de Casaio, en Carballeda de Valdeorras, que queimou ao redor de 440 hectáreas; o de Astureses, en Boborás, cunhas 120 hectáreas calcinadas; e, desde as 23,29 deste sábado, o de San Cosmede de Cusanca, no Irixo, onde arderon unhas 680 hectáreas. Controlado está, así mesmo, o da Gudiña, que se iniciou en Pentes, e que calcinou 90 hectáreas.
A Xunta tamén deu por extinguido ás 02,09 horas un incendio activo en San Xoán de Río. Este lume finalmente queimou unhas 8,2 hectáreas: oito de monte raso e 0,2 de arboledo.
