Por Europa Press / Redacción | SANTIAGO DE COMPOSTELA | 20/08/2022 | Actualizada ás 11:37
A Federación de Autónomos de Galicia emitiu este sábado un comunicado para alertar da situación "dramática" que vive o colectivo, que perdeu ata xullo máis de 100 integrantes cada mes e que, considera, "o peor está por vir". Segundo os datos do Goberno central, apuntan desde a federación, Galicia pechou o mes de xullo con 208.020 autónomos, o que supón que, desde xaneiro, perdeu 789 persoas autónomas en cifras netas, uns datos "alarmantes" cunha tendencia que "empeora cada día".
"España é a única economía da Unión Europea que non recuperou o PIB pre-covid, a morosidade aumenta un 42% no primeiro trimestre do ano, o período medio de pago das facturas aumentou uns 83'9 días de media desde o inicio da pandemia, o final da moratoria concursal disparou os concursos de acredores nun 58%, mentres a creación de empresas en Galicia cae nun 33%, e a débeda pública bate a súa marca histórica e supera xa os 1'47 billóns de euros", apunta o colectivo.
A este "cóctel explosivo", destacan, engádese "unha inflación do 10 por cento", o prezo e a escaseza de enerxía, a "retracción do consumo" e "unha elevadísima presión fiscal", entre outras cuestións, que fan do panorama algo "realmente desolador".
Ante esta situación, a Federación de Autónomos de Galicia reclamou un "cambio radical nas políticas públicas", sobre todo en materia enerxética, económica e fiscal, "que reforce a produción propia de todas as fontes de enerxía dispoñibles", unha "profunda reforma fiscal con rebaixas impositivas", unha "redución drástica do gasto público" e "unha moratoria na aplicación do sistema de cotización por ingresos dos autónomos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.