Por Europa Press / Redacción | SANTIAGO DE COMPOSTELA | 02/09/2022 | Actualizada ás 16:14
O vicepresidente económico da Xunta, Francisco Conde, reclamou que o Goberno central "sexa sensible" coas familias e empresas a través de incentivos, axudas e bonificacións para unha baixada do prezo eléctrico.
Este venres, Conde participou en Pontevedra nunha xornada informativa sobre comunidades enerxéticas e autoconsumo, organizada por Cluergal. Alí, lamentou a problemática que padecen familias e empresas polo prezo eléctrico. O tamén conselleiro de Economía avogou por establecer recomendacións para empresas e familias, mentres que as obrigacións deben ser para as administracións, segundo defende.
Ademais, lembrou que a Xunta investiu 135 millóns desde 2014 na mellora enerxética de edificios, mentres que aforrou 60 millóns en facturas enerxéticas desde 2013 debido á contratación centralizada.
Así mesmo, apuntou que existe unha "demanda cada vez maior" en relación co autoconsumo. Pon o foco sobre a iniciativa para instalar a primeira comunidade enerxética nun polígono empresarial de Galicia, en Tecnópole, un proxecto mediante o que se instalarán dous megawatts de enerxías renovables.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.