Por Europa Press / Redacción | Santiago de Compostela | 13/09/2022 | Actualizada ás 14:03
A Central Sindical Independente e de Funcionarios (CSIF) reclamou ao Ministerio de Facenda e Función pública a apertura "inmediata" da negociación salarial nas administracións públicas, tras coñecerse o dato de Índice de Prezos ao Consumo (IPC) de agosto (10,5% para a media e 11% en Galicia).
A través dun comunicado, CSIF advertiu de que a situación "empeza a ser insustentable", xa que os elevados niveis de inflación están a minguar o poder de compra das familias, especialmente da clase traballadora.
Por iso, esixiu ao Goberno que "dea exemplo" á empresa privada e negocie unha subida nas administracións públicas, como acaba de propor o Executivo en Francia. "Os empregados públicos levan contribuíndo ao pacto de rendas desde 2010 cando por primeira vez se lles baixou o soldo e arrastran unha perda de poder adquisitivo próxima ao 20%", argumentou o sindicato.
O sindicato denunciou que, ata o momento, o Goberno fixo "oídos xordos" ás súas peticións para abrir a negociación salarial. Por este motivo, convocou en Madrid, o próximo 24 de setembro, a primeira gran mobilización sindical "contra o empobrecemento social", por unha subida salarial xusta, "por unha xubilación digna" e a calidade dos servizos públicos.
A finais de 2020 había en Galicia 147.907 empregados públicos, segundo os datos do Ministerio de Facenda para esa data. Deles, 27.198 pertencían á administración do estado e o resto eran da administración autonómica e da local.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.