'Restos do vento', mellor película no OUFF27 polo seu "sobrio e asombroso poderío visual e narrativo"
Os galardóns da sección oficial entregaranse este venres 30 no Auditorio Municipal nunha gala na que tamén se darán a coñecer o Premio Xacobeo e o do Público
Por E.P. | SANTIAGO DE COMPOSTELA | 29/09/2022 | Actualizada ás 19:17
O xurado da sección oficial de longametraxes da 27 edición do Festival de Cinema Internacional de Ourense, outorgou o palmarés, co premio á mellor película para 'Restos do Vento' (Portugal/Francia), de Tiago Guedes.
'Restos do Vento' recibe o galardón polo seu "sobrio e asombroso poderío visual e narrativo, que logra con audacia facer unha película de sorprendente e misteriosa forza fílmica que, sen deixar de ser exquisita e sen facer concesións efectistas, ten a capacidade de volverse tamén atractiva para un público amplo".
O Premio Carlos Velo á Mellor Dirección vai para Radivoje Andric por 'How I Learned to Fly' (Serbia/Croacia/Bulgaria/Eslovenia), mentres o Premio Especial do Xurado é para 'A auga' (España/Suíza/Francia), de Elena López Rise.
Mentres, o mellor guión foi a parar a Jean-Pierre e Luc Dardenne por 'Tori et Lokita' (Bélxica/Francia) e o Premio á Mellor Interpretación, para Arawinda Kirana por 'Yuni' (Indonesia/Francia/Australia/Singapura), de Kamila Andini.
Os galardóns da sección oficial entregaranse este venres 30 no Auditorio Municipal nunha gala na que tamén se darán a coñecer o Premio Xacobeo e o do Público; e os premios de OUFF en Curto e Fas Muvis terán o seu acto de entrega o sábado 1 de outubro no Teatro Principal.
