A oposición "non entende" que Sanidade "obrige" aos maiores de 80 anos a ir aos vacinódromos
Comesaña responde que estes recintos teñen "facilidades" e que quen o prefiran poderán optar por acudir ao centro de saúde na repesca
Por Europa Press / Redacción | SANTIAGO DE COMPOSTELA | 04/10/2022 | Actualizada ás 16:22
Os portavoces de BNG e PSdeG, Montse Prado e Julio Torrado, criticaron con dureza que se cite aos maiores de 80 nos centros masivos de vacinación para a cuarta dose fronte á covid-19; mentres que o conselleiro de Sanidade, Julio García Comesaña, pediu non "alarmar" e, tras reiterar que quen o prefiran poderán optar por acudir ao centro de saúde na repesca, esgrimiu que houbo "moitas peticións" para citalos nos 'vacinódromos'.
Nunha comparecencia na Cámara galega, Comesaña augurou que a campaña será "exitosa" e incidiu en que, salvo os maiores de 80, que si foron convocados nos seus centros de saúde, o resto da poboación xa foi citada nos 'vacinódromos' nas anteriores ocasións. Por iso, asegurou que anima á poboación a vacinarse e garantiu que "onde" non será un impedimento.
"Temos dispostos os puntos de vacinación masiva para que, quen queiran ir a eles e poidan, vaian. E os que non vaian, van ser chamados nunha repesca na que poderán ir ao centro de saúde. O noso interese é que se vacinen", dixo, nun debate no que a portavoz popular da área, Encarna Amigo, incidiu, ademais, en que as persoas con "invalidez" pódena recibir na súa casa.
"Eu non podo ser máis claro: terán as dúas posibilidades (o 'vacinódromo' e o seu centro de saúde --na repesca--)", defendeu o conselleiro, quen aludiu ás "facilidades" que os grandes recintos ofrecen en cuestións como o aparcadoiro, antes de remarcar que houbo "moitas peticións" para que a vacinación dos maiores puidésese facer nos centros masivos.
"TRASLADAMOS O MALESTAR DE MILES DE PERSOAS"
"Por moi vehemente que se poña, o BNG non crea alarma; trasladamos o malestar dos miles de persoas que non entenden esa medida, que non entenden como obrigan a desprazarse a maiores de 80 anos", advertiu a nacionalista Montse Prado.
Tamén o socialista Julio Torrado reclamou que se recupere o mecanismo de vacinación fronte á covid-19 para os maiores nos centros de saúde reforzando o persoal, no canto de obrigar "a miles" de maiores de 80 a desprazarse a unha maior distancia mediante "os seus propios medios".
